Talǵarda nan satatyn orynnyń ıesin pyshaqtap óltirdi
QONAEV. KAZINFORM — Almaty oblysynda eki adam arasyndaǵy janjal kisi ólimimen aıaqtaldy.
Áleýmettik jelide Talǵarda nan satatyn orynnyń ıesin 13 ret pyshaqtap óltirdi degen aqparat tarady.
Almaty oblysynyń polıtsııa departamenti adam óltirý deregin rastaǵanymen, 13 ret pyshaq suǵylǵany týraly aqparat shyndyqqa janaspaıtynyn málimdedi.
Polıtsııa taratqan málimetinshe, qazir kisi óltirý deregi boıynsha qylmystyq is qozǵalǵan.
— Jedel-izdestirý is-sharalary barysynda 56 jastaǵy kúdikti anyqtalyp, ýaqytsha ustaý ızolıatoryna qamaldy. Qazirgi ýaqytta ol óz kinásin tolyq moıyndady. Aldyn ala málimetterge qaraǵanda, jábirlenýshi men kúdikti arasynda kelispeýshilik týyndaǵan. Saldarynan kúdikti er adamǵa eki ret pyshaq suǵyp alǵan. Sodan keıin oqıǵa ornynan boı tasalaǵan, — dep habarlady departamentten.
Qazir oqıǵanyń barlyq mán-jaıyn anyqtaýǵa baǵyttalǵan tergeý áreketteri júrgizilip jatyr.
Eske salaıyq, 2024 jyly Talǵarda pyshaq jaraqatynan 16 jastaǵy Sherzat Polat kóz jumdy. Bul oqıǵa qoǵamda úlken rezonans týdyryp, el nazaryn Talǵardaǵy jaǵdaıǵa aýdarǵan edi.
2025 jylǵy 5 maýsym kúni sot úkimimen 16 jastaǵy Sherzat Polattyń ólimine qatysty 9 adam 1,5 jyldan 23 jylǵa deıin sottaldy.
