Talǵarda qylmystyń basym bóligi ishimdik saldarynan bolyp jatyr — polıtsııa

QONAEV. KAZINFORM — Almaty oblysynyń Talǵar aýdanynda kóshedegi qylmystyń sebep-saldaryna taldaý júrgizilip, profılaktıkalyq sharalar kúsheıtildi.

— Talǵar aýdanynda júrgizilgen taldaý nátıjesinde kóshe qylmystarynyń 90%-y alkogoldik masań kúıde jasalatyny anyqtaldy, — dep málimdedi Almaty oblysy polıtsııa departamentiniń baspasóz qyzmeti.

Quqyq buzýdyń aldyn alý jáne túngi ýaqytta qoǵamdyq qaýipsizdikti qamtamasyz etý maqsatynda spırttik ishimdikterdiń satylýyna baqylaý kúsheıtilgen. Polıtsııa jasaqtary turǵyndardyń jappaı demalatyn jáne serýendeıtin oryndaryna jaqyndatylyp otyr.

Polıtsııanyń málimetinshe, júıeli sharalardyń arqasynda kóshedegi qylmys sany azaıǵan.

Al profılaktıkalyq is-sharalar barysynda 12 arnaıy talap pen 37 qorǵaný uıǵarymy shyǵarylyp, otbasylyq-turmystyq qatynastar aıasyndaǵy quqyq buzýdyń aldyn alý jumystary júrgizilgen. Sondaı-aq alkogol ónimderin satý erejelerin buzǵan 12 saýda núktesine ákimshilik shara qoldanylǵan.

Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi.

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıinirek bul oqıǵa boıynsha polıtsııa qyzmetkerleriniń áreketsizdigine baılanysty is qozǵaldy.