Talǵarda Hasan Qasymbaevqa qatysty sot otyrysy bastaldy
QONAEV. KAZINFORM - Talǵar aýdandyq sotynda Hasan Qasymbaev jáne ózge de kúdiktilerge baılanysty sot otyrysy bastaldy.
Hasan Qasymbaevqa adam urlaý, densaýlyqqa qasaqana aýyr zııan keltirý jáne bopsalaý faktileri boıynsha aıyp taǵylyp otyr.
Tóraǵalyq etýshi sýdıa Aınagúl Tuqybaeva sot otyrysyna BAQ ókilderiniń qatysýyna ruqsat berdi. Alaıda jábirlenýshiler men aıyptalýshylardy jáne basqa da sot protsesine qatysýshylardy túsirýge tyıym saldy.
Aıta keteıik, Hasan Qasymbaev byltyr qarasha aıynda qamaýǵa alyndy.
Buǵan deıin 16 jastaǵy Sherzat Polattyń óliminen keıin talǵarlyqtar ony «Hýtorskıe» tobynyń basshysy bolýy múmkin ekenin aıtqan edi.
Keıin Іshki ister mınıstriniń birinshi orynbasary Baýyrjan Álenov kásipker Hasan Qasymbaevqa qatysty túsinik berdi.
Bas prokýratýra Talǵarda adam urlap, uryp-soǵýǵa qatysty isti qaıta qarady.
Almaty oblysy polıtsııa departamentiniń tergeý basqarmasy osy jyldyń 21 shildesinde isti aıyptaý aktisimen oblys prokýratýrasyna joldaǵan. Al oblys prokýratýrasy 29 shildede is boıynsha qurylǵan aıyptaý aktisin bekitip, isti negizinen qaraý úshin Talǵar aýdandyq sotyna joldady.