Talǵarda er adam azamattyq nekedegi jubaıyn pyshaqtap óltirdi

QONAEV. KAZINFORM — Almaty oblysy Talǵar aýdany Rysqulov aýylynda áıel adam kisi qolynan qaza tapty. Ony óltirdi degen kúdikpen 45 jastaǵy er adam ustalyp, ýaqytsha ustaý ızolıatoryna qamaldy.

Aldyn ala málimet boıynsha, otbasylyq janjal kezinde aýyl turǵyny azamattyq jubaıyna pyshaqpen eki ret soqqy jasap, saldarynan jábirlenýshi birneshe saǵattan keıin kóz jumǵan.

Áıeldiń denesindegi jaraqattardy týystary anyqtaǵan. Oqıǵa ornyna jetken polıtsııa qyzmetkerleri kúdiktini ustap, qamaýǵa aldy.

— Qazir bolǵan oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan tergeý áreketteriniń kesheni júrgizilip jatyr. Tergeý sharalarynyń nátıjesi boıynsha qoldanystaǵy zańnama talaptaryna qatań sáıkes protsessýaldyq sheshim qabyldanady, — dep habarlady polıtsııa.

Eske salaıyq, buǵan deıin Shymkentte 21 jastaǵy qyzdy pyshaqtap óltirdi degen kúdikti ustalǵanyn habarlaǵan edik.