Talǵarda er adamnyń ólimine baılanysty áıeli men enesi ustaldy

QONAEV. KAZINFORM – Talǵarda otbasylyq janjal qaıǵyly oqıǵamen aıaqtaldy.

Aldyn ala málimet boıynsha, jylqy saýdasyna qatysty týyndaǵan otbasylyq kıkiljińnen keıin er adam mert bolǵan. Advokaty Asylbek Ábdiraıymovtyń aıtýynsha, áıeli kúıeýine eskertpesten jylqylaryn satyp jibergen, sodan keıin er adam polıtsııaǵa aryz túsirgen. 

– Jaqynda qaıǵyly jaǵdaı boldy. Er adamdy áıeli men enesi óltirdi degen kúdikke ilindi. Áıelder uıyqtap jatqan azamatqa shabýyl jasap, oǵan 30-dan astam pyshaq jaraqatyn salǵan degen boljam bar. Bir janjal, bir sáttegi ashý-yza birneshe taǵdyrdy birden talqandady, – dep jazdy advokat.

Almaty oblystyq Polıtsııa departamenti atalǵan derek boıynsha Qylmystyq kodekstiń 99-baby 2-bóligi 7-tarmaǵy («Aldyn ala sóz baılasý arqyly adamdar toby jasaǵan adam óltirý») boıynsha qylmystyq is qozǵalǵanyn rastady.

– Otbasylyq-turmystyq janjal negizinde adamdar toby jasaǵan adam óltirý deregi boıynsha qylmystyq is qozǵaldy. Kúdiktiler ustalyp, ýaqytsha ustaý ızolıatoryna qamaldy. Oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý amaldary júrgizilip jatyr, – dep habarlady polıtsııadan.

Eske salaıyq, byltyr Talǵarda jantúrshigerlik qylmys boldy. Beıtanys adam er kisini atyp, kishkentaı qyzdy alyp qashyp ketken edi. 

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıin polıtsııanyń arnaıy jasaǵy qyzdy bosatyp, kúdiktini ustady.