Talǵarda bıiktigi 40 metrlik munaradan sekirmek bolǵan qyz qutqaryldy
ASTANA. QazAqparat - Talǵarda qazandyq munarasynan sekirmek bolǵan qyz qutqaryldy. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov aıtty, dep habarlaıdy QazAqparat tilshisi.
Onyń aıtýynsha, 19 aqpan kúni saǵat 11-18-de Almaty oblysyna qarasty Talǵar aýdanynyń Talǵar qalasynda "Baıserke-Agro" JShS-niń aýmaǵyndaǵy jumys istemeıtin qazandyqtyń munarasynan 2000 jyly dúnıege kelgen qyzdyń sekirmek bolyp turǵandyǵy týraly aqparat túsken. Oqıǵa ornyna Talǵar qalalyq órt sóndirý bóliminiń mamandary, polıtsııa qyzmetkerleri attanǵan.
"Qazandyq Talǵar aýdanyna qarasty Arqabaı aýylynyń shetinde ornalasqan jáne qubyrynyń uzyndyǵy 35-40 metr. Talǵar qalasynyń №2-MÓS bóliminen Arqabaı aýylyna deıingi aralyq 30 shaqyrymdy quraıdy. Oqıǵa ornyna jetken órt sóndirýshi Rıshad Rahımov pen Talǵar aýdandyq TJB aǵa ınjeneri Nursultan Nurǵalıev jumys istemeıtin qazandyqtyń munarasyna órmelep shyqty. Qyzben sóıleskennen keıin saǵat 12-40-ta ony arnaıy qutqarý arqanynyń kómegimen jerge túsirdi", - dedi Nursultan Nurahmetov.
