Talǵar soty Hasan Qasymbaev isi boıynsha úkimniń egjeı-tegjeıin túsindirdi
QONAEV. KAZINFORM — Almaty oblysy Talǵar aýdandyq soty Hasan Qasymbaev pen taǵy bes sottalýshyǵa qatysty úkimniń mán-jaıyn túsindirdi.
Sottyń málimetinshe, Hasan Qasymbaev QR QK-niń 28-baby 3-bóligi, 125-baby 2-bóliginiń 1), 3) tarmaqshalary, 28-baby 3-bóligi, 106-baby 2-bóliginiń 3), 5), 7) tarmaqshalary, 194-baby 2-bóliginiń 1), 2) tarmaqshalary boıynsha (adam urlaýdy, qasaqana aýyr zııan keltirýdi, qorqytyp alýshylyqty uıymdastyrǵany úshin) jaýapqa tartyldy.
Qalımjanov, Aqtanov, Álıev, Asqarov, Sultanbekov — QR QK-niń 125-baby 2-bóliginiń 1), 3) tarmaqshalary, 106-baby 2-bóliginiń 3), 5), 7) tarmaqshalary boıynsha (adam urlaý jáne qasaqana aýyr dene jaraqatyn keltirý) aıyptaldy.
Hasan Qasymbaev basqa sottalýshylarmen aldyn ala sóz baılasyp, azamat Álimovke kúsh qoldanyp, urǵan.
Aıyptalýshylar Qalımjanov, Aqtanov, Álıev, Asqarov, Sultanbekov jábirlenýshi Arman Álimovti kúshtep kólikke otyrǵyzyp, eldi mekennen tys jerge aparyp, soqqyǵa jyqqan.
Saldarynan jábirlenýshi aýyr dene jaraqatyn alǵan. Budan bólek, Qasymbaev basqa tulǵalarmen birge azamat Áripjan Tájıevten 1 000 000 teńge kólemindegi aqshany kúsh qoldanyp, qorqytyp alǵan.
— Aıyptalýshylardyń kinási jábirlenýshilerdiń aıǵaqtarymen, oqıǵa bolǵan jerdi qaraý hattamalarymen, bettestirý nátıjelerimen jáne saraptamalardyń qorytyndylarymen dáleldendi, — dep habarlady Almaty oblysy Talǵar aýdandyq soty.
Sot jasalǵan qylmystardyń sıpaty men qoǵamdyq qaýiptilik dárejesin, sondaı-aq aıyptalýshylardyń jeke tulǵasyn eskerip, mynadaı jaza taǵaıyndady:
* Hasan Qasymbaev — uıymdastyrýshy retinde 12 jyl bas bostandyǵynan aıyrý;
* Madııar Qalımjanov. — buryn aýyr qylmys (buzaqylyq) úshin sottalǵanyn eskere otyryp, 9 jyl 6 aı bas bostandyǵynan aıyrý;
* Saılaý Aqtanov — buryn aýyr qylmys (buzaqylyq) úshin sottalǵanyn eskere otyryp, 8 jyl 6 aı bas bostandyǵynan aıyrý;
* Nurmuhamet Sultanbekov — buryn asa aýyr qylmys (kisi óltirý) úshin sottalǵanyn eskere otyryp, 22 jyl bas bostandyǵynan aıyrý;
* Álıev jáne Asqarov — buryn sottalmaǵan, 8 jyl bas bostandyǵynan aıyrý.
Úkim zańdy kúshine engen joq.
Eske salaıyq, búgin, 11 qarashada Talǵar aýdandyq soty Hasan Qasymbaevty adam urlaý, densaýlyqqa qasaqana aýyr zııan keltirý jáne qorqytyp aqsha bopsalaý isi boıynsha kináli dep tanydy.
Sot oǵan 12 jyl bas bostandyǵynan aıyrý jazasyn taǵaıyndady.
Sonymen qatar is boıynsha taǵy bes adamǵa úkim shyqty.
Munyń aldynda Hasan Qasymbaevtyń advokattary sot úkimimen kelispeı, apellıatsııalyq shaǵym túsiretinin jazǵanbyz.