Talǵar isiniń ýshyǵýyna Baýyrjan Álenov te jaýapty — depýtat

ASTANA. KAZINFORM — Kazinform tilshisi Parlament Májilisi Zańnama jáne sot-quqyqtyq reforma komıtetiniń múshesi Qaırat Balabıevten Talǵar oqıǵasyndaǵy quqyq qorǵaý ókilderiniń áreketine prokýratýra salasyndaǵy tájirıbesine súıenip baǵa berýin surady.

«Oqıǵanyń búkil astaryn quqyq qorǵaý organdarynyń basshylary tekseretin shyǵar. Biraq endi ózderińiz kórip otyrsyzdar, aýdan ákimdigi men óńirlik polıtsııa qyzmetiniń basshylyǵyndaǵy biraz laýazymdy tulǵa, aýdan prokýrory jumystan ketti ǵoı. Osynyń bári jergilikti quqyq qorǵaý organdary men atqarýshy bıliktiń saıasatty turaqty ustaýda jiberip jatqan kemshilikteriniń kesirinen bolyp jatyr», — dedi depýtat.

«Bul jaıt quqyq qorǵaý organdary men jergilikti krımınal elementteriniń aýyz jalasyp alǵanyn kórsetpeı me?» — degen suraqqa ekiushty jaýap berdi.

«Ol da bolýy múmkin. Talǵar oqıǵasy, bylaı aıtqan kezde, búkil halyq qadaǵalap otyratyn sondaı bir úlken rezonans alyp ketti. Sondyqtan quqyq qorǵaý organynyń basshylary bar, UQK bar, bári qarap keleshekte bul máseleni sheshedi dep oılaımyn», — dedi ol.

Májilis ókili Almaty oblysynda jergilikti polıtsııa, prokýratýra qyzmetin basqaratyn laýazymdy tulǵalar jetkilikti deńgeıde rotatsııalanyp otyr dep esepteıtinin aıtty.

«Rotatsııanyń tıimdi jumys isteýi merzimine baılanysty emes. Bul jerde men taǵaıyndalǵan azamattardyń bári uzaq jyl boıy jumys istep jatty dep oılamaımyn. Bul jerde negizi oqıǵa bolǵannan keıin zańdy sheshim qabyldaný kerek edi. Qysqasy, isti asqyndyryp jibermeý kerek edi. Der kezinde sheshim qabyldap, kináli adamdardy qamaý kerek edi. Áke-sheshesiniń kózinshe jasalǵan aýyr qylmys bolǵannan keıin rezonansty sıpat alyp ketedi-aý dep oılaý qajet edi. Sonyń aldyn alý kerek edi», — dedi Qaırat Balabıev.

«Oqıǵa bolyp jatqan kezde qazirgi Іshki ister mınıstriniń birinshi orynbasary Baýyrjan Álenov sol óńirdiń polıtsııa departamentin basqaryp turdy. Osyndaı olqylyqtarǵa jol bergen mamannyń ishki ister salasyndaǵy ekinshi adam bolyp otyrýy qanshalyqty oryndy?» — degen suraqqa depýtat basshylar jan-jaqty qarap sheshim qabyldaý kerektigin aıtty.

«Bul áleýmettik jelide jazylyp jatyr. Meniń oıymsha, Memleket basshysy, quqyq qorǵaý organdarynyń basshylary jan-jaqty qarap sheshim qabyldaıdy dep oılaımyn. Mysaly, ol taǵaıyndalǵan kisiniń bul oqıǵaǵa kinási de bolmaýy múmkin. Bir jaǵynan sol óńirde istegennen keıin báribir ol da jaýapty. Ol kisi Talǵardyń búkil saıası ahýalyn biledi ǵoı, negizi shuǵyl tapsyrma berip, zańdy sheshimder qabyldaǵanda mundaı nárse bolmaýy da múmkin edi. Ózderińiz kórip otyrsyzdar. Bizde keıin baryp sheshim qabyldap jatady. Qazir 11 adam qamaldy. Birden durys quqyqtyq baǵa berilip, 11 adam sol kezde túgel qamalsa, aıqaı-shý mundaı dárejege jetpes edi», — dedi Qaırat Balabıev.

Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.

Ashýly talǵarlyqtar jasóspirim ólimine baılanysty narazylyqqa shyqty.

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.

Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.

Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.

12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

Sondaı-aq Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.

Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.

Qoǵamdyq tártipti qadaǵalaý úshin Ulttyq ulan áskeri jumyldyryldy.

15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy.

Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. Al,Talǵar aýdanynyń ákimi Tanat Esenkeldiuly Aıdarbekov jáne onyń orynbasary Aıbek Dúısembekuly Bıdaev sógis aldy.

Іshki ister mınıstrliginiń ókilderi BAQ qyzmetkerlerine Sherzat Bolat qaza tapqan jerde kameraǵa túsip qalǵan vıdeony kórsetti.

Prokýratýra sottyń ashyq ótýin suraıtyndaryn jetkizdi.

Artynsha marqum Sherzat Bolattyń isi boıynsha Almaty oblysynyń birneshe joǵary laýazymdy polıtsııa qyzmetkeri qyzmetinen bosatyldy.