Talǵar ózeninde balyqtar jappaı qyryldy
ALMATY OBLYSY. QazAqparat – Almaty oblysy Talǵar aýdanynyń turǵyndary Talǵar ózenindegi balyqtyń jappaı qyrylýy men sýdyń jaǵymsyz ıisine shaǵymdandy. Mamandar máseleniń mán-jaıyn anyqtap jatyr, dep habarlaıdy QazAqparat tilshisi.
Kýágerler ózen jaǵasyndaǵy óli balyqtardy vıdeoǵa túsirgen. Olardyń boljaýynsha, jaqyn mańda ornalasqan kompanııa las sýdy ózenge aǵyzýy múmkin.
«Almaty oblysy, Eńbekshiqazaq aýdany, Bazarkeldi aýyly... Barlyq balyq bir ýaqytta qyrylyp qaldy, sýdan jaǵymsyz ıis shyǵady. Munyń bári qashan bitedi, birinshi jyl emes qoı. Qashan naqty sharalar qabyldaıdy?», - dep shaǵymdandy turǵyndar áleýmettik jelilerde.
Eńbekshiqazaq aýdanynyń ákimdigi habarlaǵandaı, Qapshaǵaı balyq bóliminiń mamandary ekspedıtsııa bóliminiń basshysymen, tabıǵatty qorǵaý polıtsııasy qyzmetkerlerimen jáne Jańashar aýyldyq okrýginiń ákimimen birlesip, 10 tamyz kúni balyqtyń qyrylýy faktisi boıynsha Talǵar ózeniniń jaǵalaýyn teksergen.
«Sýdyń synamalary alynyp, ári qaraı zerthanalyq taldaý úshin balyq shabaqtary jınaldy. Taldaý nátıjeleri aldaǵy ýaqytta Almaty oblysynyń Ekologııa departamentine joldanatyn bolady. Tıisti sharalar qabyldanady», - dep jaýap berdi ákimdik.
