Talǵar ózeni mańyndaǵy «Spýtnık» balalar lagerinen 400 bala qaýipsiz jerge shyǵaryldy
ASTANA. QazAqparat - Talǵar ózeni mańynda ornalasqan «Spýtnık» balalar lagerinen 400 bala qaýipsiz jerge kóshirildi, dep habarlaıdy QR ІІM Tótenshe jaǵdaılar komıtetiniń baspasóz qyzmetinen.
Budan buryn habarlanǵandaı, Almaty oblysynda Komsomolka muzdyǵynyń astynda jańbyr saldarynan Talǵar ózeninde sel túzildi. Qazirgi kezde «Úlken alańqaı» gıdropostynda sý shyǵyny 17 kýb m/s quraıdy, al tótenshe jaǵdaı týdyratyn sý shyǵyny deńgeıi ádette 45 kýb m/s bolady.
«Adamdardyń qaýipsizdigi úshin Talǵar ózeniniń joǵarǵy jaǵyna jaqyn mańda ornalasqan saıajaılar men demalys úılerinen turǵyndardyń bir bóligi qaýipsiz jerlerge shyǵarylýda. «Spýtnık» balalar lagerinen 515 adam evakýatsııalandy, onyń ishinde 400 bala bar», delingen habarlamada.
Bul jumystarǵa Almaty oblysy men Almaty qalasynyń TJ departamentteri men polıtsııa bólimsheleri jumyldyrylǵan.
