Talǵar oqıǵasy «tergeý qupııasy» týraly bapty qaıta qaraý kerektigin kórsetti – Abzal Quspan
ASTANA. KAZINFORM – Májilis depýtaty Abzal Quspan Talǵar oblysyndaǵy qandy oqıǵadan resmı aqparat taratý qanshalyqty zań aıasyna saı júrip jatqany týraly pikir bildirdi.
«Qylmystyq-protsestik kodekstiń «201-babynda mynandaı bir erekshelik bar. «Tergeý dereginiń bárin ashýǵa bolmaıdy. Prokýror belgili bir shekte ashýǵa quqyly», - dep keledi. Ol quqyq prokýrorǵa berilgen. ıAǵnı, prokýror qupııalyqty buzbaý sheginen aspaıtyndaı deńgeıde málimetterdi asha alady. Talǵardyń vıdeosyna kelsek, qoǵam shýlap ketti, men ózim de talap ettim. Prokýratýra jýrnalısterge, qoǵamnyń suranystaryna ashyq bolýy kerek. Sondyqtan ol prokýrordyń quzyretindegi másele. Al tergeý oryndary, ishki ister organdary óz erikterimen ol málimetti asha almaıdy», - deıdi depýtat.
Zańger atalmysh 201-bapty ózgertý kerektigin qańtar oqıǵasynan beri aıtyp kele jatqanyn eske saldy.
«Qazirgi tańda Májiliste qaralyp jatqan zań jobasy aıasynda bul másele talqylanyp jatyr. Qazir biz ishki ister organdaryn da, prokýrorlardy da «Nege myna aqparatty bermeısiń?», «Nege myna málimetti tolyq ashpaısyń?» - dep aıyptaı almaımyz. Óıtkeni qoldanystaǵy 201-bap olarǵa kedergi. Al endi bizdegi zań uzaq qaralady ǵoı. Ol endi shamamen, jobamen kelesi jyldary shyǵady. Biraz protsedýrasy bar. Negizi ol másele aktýaldy. Talǵar oqıǵasy aıasynda da ol máseleni aıttym. 201-bapty biz qaıta qaraýymyz kerek», - dedi Abzal Quspan.
Depýtat ozyq elderdiń tájirıbesinde Qazaqstandaǵydaı qatań shekteý joq ekenin aıtady.
«Árıne, otbasy qupııasyna baılanysty bolmasa jynystyq sıpattaǵy qylmystar bar. Olardyń ashýǵa bolmaıdy. Memleketti qupııasy bar ister bolady. Mine, sondaı shekteýlerdi qaldyryp, qalǵan ister aqparatty ashyq bergen durys. Óıtkeni, birinshiden, qoǵamnyń talaby osyndaı bolyp tur. Ekinshiden, biz basqa damyǵan batys elderiniń, Amerıkanyń tájirıbesin kórip otyrmyz. Ol jerde osyndaı bir rezonansty ister bolsa, polıtsııa kóp jaǵdaıda qyzmeti el aldyna shyǵyp, oqıǵanyń mán-jaıyn jýrnalısterge aıtady. Ashyqtyq degen nárse bar. Al bizde keńes úkimetiniń kezinen qalyp qoıǵan moraldik turǵyda bir eskirgen norma jumys istep keledi», - dedi Májilis depýtaty.
Eske salsaq, keshe Іshki ister mınıstrliginiń ókilderi Talǵardaǵy 16 jastaǵy Sherzat Bolat qaza tapqan jerde kameraǵa túsip qalǵan vıdeony kórsetken edi.
