Talǵar qalasynyń ákimi qyzmetinen ketti
QONAEV.KAZINFORM – Talǵar qalasynyń ákimi Arystanbek Ábilqaıyruly 1 jyl 2 aıdan keıin qyzmetinen ketti.
Bul týraly ol qala ákimdiginiń jelidegi paraqshasynda habarlandy. Arystanbek Ábilqaıyruly densaýlyǵyma baılanysty laýazymynan ketý týraly sheshim qabyldaǵanyn aıtty.
- Densaýlyǵyma baılanysty óz qyzmetimdi aıaqtaý týraly sheshim qabyldadym. Bul sheshim maǵan ońaıǵa soqqan joq. Densaýlyǵyma baılanysty biraz ýaqyt eńbek demalysynda boldym. Densaýlyq jaǵdaıy qyzmettik mindetterimdi tolyq ári jaýapkershilikpen atqarýǵa kedergi keltirmeýi úshin osyndaı sheshim qabyldaýdy durys dep sanaımyn, - dep jazdy ol.
Saılaý nátıjesinde Arystanbek Ábilqaıyruly 2024 jyldyń jeltoqsan aıynda qala ákimi qyzmetine taǵaıyndalǵan edi. Ol kópshilikke áleýmettik jelidegi belsendi jumysy men adamdarǵa keri baılanysy arqyly keńinen tanyldy.