Talǵar aýdanyndaǵy sel kóshkini saldarynan áli de 200-deı adam qutqarý jumystaryna muqtaj
ASTANA. QazAqparat - Talǵar aýdanynda sel kóshkini saldaryn joıý jumystary jalǵasyp jatyr. Keshe oqıǵa ornyna QR TJM Valerıı Petrov baryp, «Qazseldenqorǵaý» mamandarymen Kishi jáne Úlken Almaty jáne Talǵar shatqaldary ústinen ushyp ótti. Bul týraly 24.kz habarlady.
Osydan keıin mamandar apatqa sebep bolǵan shatqalǵa bardy. Bir túnniń ishinde ol jerdegi sýdyń barlyǵy aǵyp ketken. «Spýtnık» jazǵy demalys aımaǵyna aparatyn joldaǵy sel kóshkini aýmaǵynyń qanshalyqty ekenin mamandar naqty aıta almady. Lagerde áli 200-deı adam bar. Olardyń kóbisi balalar, sondyqtan qutqarý ázirge múmkin emes. Sebebi, kóbisi uzaq jaıaý júriske shydamaıdy. Joldy tazalý jumystary jalǵasyp jatyr. «Talǵarda jaǵdaıdy eshkim boljaı da alǵan joq, bul - tabıǵattyń tosyn minezi. Mundaı máseleni sheshýdiń bir ǵana joly bar, - sý aǵyp ketetindeı sıfondy júıe jasaý. Ony biz jyl saıyn jaz aılarynda jasap ta kelemiz», - dedi vıtse mınıstr V.Petrov.
