Talǵar aýdanynda topyraq kóship, adamdar evakýatsııalandy - Almaty
ALMATY. QazAqparat - Talǵar aýdanynda keshe túnde nóser jaýyn jaýyp, saldarynan 5 eldi mekendegi 20 aýlany sý basyp qalǵan, dep habarlaıdy QazAqparat tilshisi.
Almaty oblystyq TJD baspasóz hatshysy Azamat Jurtbaevtyń aıtýynsha, túngi 1 saǵat shamasynda Talǵar ózeni basseıninde topyraq kóshken.
«Qazir saz-balshyq kólemi anyqtalyp jatyr. Oqıǵa bolǵan jerden 12 adam qaýipsiz jerge kóshirildi. Tótenshe jaǵdaı saldarynan ırrıgatsııalyq kanaldyń aýzy bitelip, saıabaq turǵyndarynyń úılerin sý aldy», - dedi A.Jurtbaev.
«Qazseldenqorǵaý» MM habarlaýynsha, «Besaǵash-Besqaınar» avtojolynyń 5-6 shaqyrymynda sel júrip, saz-balshyq massasy joldy jartylaı jaýyp qalǵan. Japa shekkender joq. Oqıǵa ornynda mamandar jumys istep jatyr.
Al tańǵy 4:20 shamasynda Qotyrbulaq ózeni basseıninde 18 jerde topyraq kóship, joldy jaýyp qaldy. Atalǵan aýmaqta 45 mm shamasynda jaýyn jaýǵan.
Qazir aýdan bıligi atalǵan aýmaqta kólikterdiń júrýine tyıym saldy.
Oblystyq TJD mamandary tarapynan komıssııa qurylyp, tótenshe jaǵdaı bolǵan jerde jumys jasap jatyr.
