Talǵar aýdany prokýratýra nazarynda: 10 kúnde 20 qylmys ashyldy

QONAEV. KAZINFORM — Talǵar aýdanynda prokýratýranyń úılestirýimen polıtsııa basqarmasy keń aýqymdy jedel-profılaktıkalyq is-sharalar júrgizdi. 

Almaty oblysy prokýratýrasynyń málimetinshe, 10 kún ishinde 1322 ákimshilik quqyq buzý anyqtaldy, 20 qylmys ashyldy, onyń 8-i buryn jasalǵan qylmys. Sondaı-aq 2 kúdikti ustaldy.

Patrýldik polıtsııa jol qozǵalysy erejelerin buzǵany úshin 782 hattama toltyrdy. 12 avtokólik aıypturaqqa qoıylyp, 25 memlekettik nómir alyndy.

Qoǵamdyq qaýipsizdik baǵyty boıynsha 540 ákimshilik hattama toltyrylyp, 19 adam ýaqytsha beıimdeý jáne detoksıkatsııa ortalyǵyna jetkizildi.

Al ıývenaldy polıtsııa tarapynan kámeletke tolmaǵandardyń túngi ýaqytta oıyn-saýyq oryndarynda bolýy jáne ata-analardyń tárbıelik mindetterin tıisinshe oryndamaýy boıynsha 44 hattama toltyrylǵan. Azamattyq qarý ıelerin tekserý barysynda 5 qarý alynyp, 5 ákimshilik hattama rásimdelgen.


Sondaı-aq mıgratsııalyq zańnamany buzǵany úshin 192 ákimshilik hattama toltyrylyp, 15 shetel azamaty elden shyǵaryldy.

— Krımınogendik ahýalǵa jasalǵan taldaý Talǵar qalasy, sondaı-aq Tuzdybastaý men Besaǵash aýyldyq okrýgteri álsiz aımaq bolyp otyrǵanyn kórsetti. Osy aýmaqtarda, ásirese túngi ýaqytta, patrýldik qyzmet kúsheıtildi, — dep habarlady prokýratýradan.

Eske salaıyq, byltyr 4 qazan kúni tóbelesten 16 jastaǵy Sherzat Polat qaza tapty. Bul oqıǵadan keıin Talǵardaǵy jaǵdaı el nazaryn aýdardy.

Bıyl qyrkúıek aıynyń basynda Talǵar aýdany Qyzylqaırat aýylynda er adam tanys áıeldiń baýyryn atyp óltirip, onyń qyzyn urlap ketken.

Keıin kúdikti ustalyp, bala anasymen qaýyshty.

Bul oqıǵa boıynsha Almaty oblysynyń prokýratýrasy Talǵar aýdandyq polıtsııa basqarmasy qyzmetkerlerine qatysty Qylmystyq kodekstiń 370-babynyń 4-bóligi («Laýazymdy tulǵalardyń áreketsizdigi») boıynsha qylmystyq is qozǵady.