Talǵar aýdany ákimi apparatynyń basshysy qyzmetinen bosatyldy

QONAEV. KAZINFORM – Talǵar aýdany ákimi apparatynyń basshysy Aslan Qasymbaev qyzmetinen bosatyldy.

«Sonymen qatar Talǵar aýdanynyń ákimi Tanat Esenkeldiuly Aıdarbekov jáne onyń orynbasary Aıbek Dúısembekuly Bıdaev «sógis» túrindegi tártiptik jaýapkershilikke tartyldy», - delingen resmı aqparatta.

Osyǵan deıin Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatylǵany týraly jazǵan bolatynbyz. 

Búgin Іshki ister mınıstrliginiń ókilderi Talǵardaǵy 16 jastaǵy Sherzat Bolat qaza tapqan jerde kameraǵa túsip qalǵan vıdeony kórsetti. 

Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.

Ashýly talǵarlyqtar jasóspirim ólimine baılanysty narazylyqqa shyqty. 

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady. 

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy. 

Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi. 

Almaty oblystyq Polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi. 

12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.