Talǵar aýdandyq aýrýhanasynyń dırektoryna qatysty qyzmettik tergeý bastaldy

Laýra Myrzaǵalı Talǵar aýdandyq ortalyq aýrýhanasynyń medıtsınalyq dırektory qyzmetinen bosatyldy. Qazir oǵan qatysty qyzmettik tergeý bastaldy, dep habarlaıdy Kazinform. 

«A-Class Medical» senimgerlik basqarýshy kompanııasynyń baspasóz qyzmetiniń málimetinshe, L.Myrzaǵalı júrgizilip jatqan qyzmettik tergeýge baılanysty qyzmetinen bosatyldy. Bul sheshim jergilikti ınternet-basylymdardyń ashyq betterinde usynylǵan dálelder men materıaldar negizinde qabyldandy.

«Medıtsınalyq dırektordy ornynan alyp tastaýdaǵy maqsat – Talǵar aýdandyq ortalyq aýrýhanasynyń medıtsına qyzmetkerlerine qatysty zańsyz áreketterdi tergeýdiń obektıvtiligin qamtamasyz etý. Qyzmettik tergeý júrgizý úshin qurylǵan komıssııa usynylǵan faktiler men mán-jaıǵa taldaý jasaıdy. Basqarýshy kompanııa tergeý barysynda obektıvtilik pen ádildik prıntsıpteriniń saqtalýyna kepildik beredi. Talǵar aýdandyq ortalyq aýrýhanasy qyzmetkerlerinen sabyr saqtap, tergeý aıaqtalmaıynsha BAQ pen áleýmettik jelide málimdeme jasamaýdy suraıdy», - delingen habarlamada. 

Byltyr jazda Laýra Myrzaǵalı memlekettik qyzmettiń bedeline nuqsan keltirgen ádepsiz qylyǵy úshin Almaty qalalyq qoǵamdyq densaýlyq saqtaý departamenti basshysynyń orynbasary qyzmetinen bosatylǵan edi.

Sondaı-aq tártiptik jaýapkershilikke tartylyp, úsh jylǵa memlekettik qyzmette jumys isteýge tyıym salyndy. 

Eske salaıyq 2022 jyly áleýmettik jelilerde Almaty qalalyq qoǵamdyq densaýlyq saqtaý basqarmasy basshysynyń orynbasarynyń qyzmetkermen syıaqy týraly sóz talastyrǵan vıdeosy taraǵan bolatyn. 

Osy jyldyń aqpan aıynda jumystan qýylǵan Laýra Myrzaǵalıdyń Almaty oblysyndaǵy aýrýhanalardyń birine jumysqa ornalasqany belgili boldy.

Keıin osyǵan baılanysty QR Memlekettik qyzmet isteri agenttigi Almaty qalasy boıynsha departamenti túsinik berdi.