Talǵar asýynda 4 sheteldik adasyp ketti
NUR-SULTAN. QazAqparat – Tıan-Shan taýlarynda bir top sheteldik saıahatshy adasyp ketti. Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
Vedomstvonyń málimetinshe, 11 qyrkúıek kúni tańerteń bir top sheteldik saıahatshy Talǵar asýyna joryqqa shyǵyp, Týrıst asýy arqyly tómen túsýge nıettengen. Polshanyń 4 adamynan jasaqtalǵan topqa Tıan-Shan taýyna saıahattaýda esh tájirıbesi joq Ýkraına azamaty jol nusqaýshy bolǵan. Saıahatshylar Alpi raýshany alańqaıy aýdanyna jetken kezde qar jaýyp, súrleý jol kórinbeı qalady. Kishi Talǵar asýyna jetken olar qardan sýsymaly batpaqqa aınalǵan soqpaqpen joǵary órlep shyǵa almaǵan. Osydan keıin sheteldikter burynǵy baǵdaryna qaıta túsip, selden qorǵaý beketine jetken. Alaıda ol jerden tiri jandy kezdestire almaǵan saıahatshylar qutqarýshylarǵa habarlasqan.
«Saǵat 14-00-de TJK Respýblıkalyq jedel qutqarý jasaǵynyń kezekshiligine sheteldikterdi asýdan tómen túsirýge kómek qajettigi týraly aqparat tústi. Jedel top bara jatqan kezde telefon arqyly adasqan adamdarǵa keńes berildi, olardyń boljamdy turǵan jeri anyqtaldy. Mundaı jaǵdaıda jergilikti jer bederi men aýa raıyn eskere otyryp, Býtakovka asýyna qaraı jyljý qajettigi túsindirildi. Sheteldikterge qardyń az jaýǵanyna qaramastan kóshkin júrý qaýpi bar ekendigin aıtylyp, barynsha abaılap júrý kerektigi eskertildi» delingen taratylǵan aqparatta.Al bul ýaqytta qutqarýshylar adasyp ketken sheteldikterge qarama-qarsy bara jatqan edi. Saıahatshylarmen baılanysyp otyrǵan kezekshi dıspetcher qutqarýshylardyń baǵdaryn da úılestirip, nátıjesinde saıahatshylar tabyldy. Sheteldikterdiń eshqaısysyna medıtsınalyq kómek qajet bolmady. Qutqarýshylar olardy din aman qalaǵa jetkizdi.
