Taldyń túbine tastalǵan balanyń anasy kinálilerdi taýyp berýdi ótindi
ALMATY. QazAqparat - Almatyda kólik qaǵyp, tal túbine tastap ketken 4,5 jasar balanyń anasy polıtsııaǵa ótinish aıtty, dep habarlaıdy QazAqparat tilshisi.
Onyń aıtýynsha, polıtsııa balany qaqqan júrgizýshini áli tappaǵan.
«Polıtsııa ázirge eshteńe aıtpady. Eshqandaı derek joq. Biz balamdy laqtyryp ketken adamdy tabýyn suraımyz. Muny jazasyz qaldyrý múmkin emes. Bul haıýan emes, bala ǵoı. Haıýandy soǵyp ketkende de adam ony joldyń shetine aparyp tastaıdy. Balany olaı qaldyrýǵa bolmaıdy...», - dedi kólik qaǵyp ketken balanyń anasy Ázıza Asqaroǵly kózine jas ala otyryp.
Qazir anasy balasymen birge aýrýhanada jatyr.
Naýqas bala neırohırýrgııalyq palataǵa aýystyryldy. Al, dárigerler 3-6 aıdan soń balanyń basyna taǵy ota jasamaq.
Aıta ketý kerek, jantúrshigerlik oqıǵa keshe Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jastaǵy balany kólik qaǵyp, qan josa bolǵan kúıde kórpege orap, taldyń túbine qaldyryp ketken. Ata-anasy birneshe mınýt ótken soń ǵana balany júzdegen metr qashyqtan taýyp alǵan.
