Taldyqorǵannyń saýdagerleri kósheniń keńeıtilýine qarsy shyqty
TALDYQORǴAN.QazAqparat - Taldyqorǵannyń saýdagerleri Qabanbaı batyr kóshesiniń keńeıtilýine qarsy. Óıtkeni jyldar boıy taýyp otyrǵan tabystarynan aıyrylyp qalýǵa qorqady. Biraq qalalyq ákimdiktiń baspasóz qyzmeti bıyl keńeıtiletin kóshede naqty qaı saýda ornynyń súriletini belgisiz ekenin jetkizdi, - dep habarlaıdy QazAqparat tilshisi.
Qazir kásipkerler kásibim qurdymǵa ketedi dep úreılense, jumysshylary jumyssyz qalamyn ba dep qorqady. Máselen, kásibin nesıe alyp, 80 myń dollarǵa satyp aldym degen Dana Sembekova saýda ornynyń súrilýine túbegeıli qarsy. Al jumysshylary qazirden jumys izdep jatqandaryn aıtady.
«Myna qaz-qatar turǵan dúkender men dárihana, lombard pen dámhana sııaqty eldiń tabys taýyp otyrǵan jerlerin súrip, ornyna sýburqaq jasaǵysy keledi eken. Sonda qalada oryndyq pen sýburqaq qoıatyn basqa jer tabylmady ma?! 100-den astam adam osy saýda oryndarynyń arqasynda bala-shaǵasyn baǵyp otyr. Erteń bárin súrip tastasa biz qaıda baramyz, bizdiń nesıemizdi kim óteıdi, bala-shaǵamyzdy kim asyraıdy», - dedi jeke kásipker Dana Sembekova.
Biraq saýdagerler qoldaryna dál osy saýda oryndarynyń súriletini jóninde birde-bir eskertý qaǵaz almaǵan. Al Taldyqorǵan qalasy ákiminiń baspasóz qyzmeti kásipkerlerdi alańdamaýǵa shaqyrdy.
«Saýdagerlerdiń alańdaıtyn sebebi joq. Negizi naqty qaı ǵımarattyń súriletini ázirge belgisiz. Jobalyq-smetalyq qujat shamamen kóktemniń aıaǵynda jazdyń basynda daıyn bolady. Sol kezde qaı ǵımarattyń súriletini anyqtalady», - dedi Taldyqorǵan qalasy ákiminiń baspasóz hatshysy Danııar Janys.
