Taldyqorǵannyń ortalyq atanǵanyna 20 jyl – Amandyq Batalov qalany kórýge shaqyrdy
NUR-SULTAN. QazAqparat – Bıyl Almaty oblysynyń ortalyǵyn Taldyqorǵan qalasyna kóshirý sheshiminiń qabyldaǵanyna 20 jyl toldy. Osyǵan oraı, Almaty oblysynyń ákimi Amandyq Batalov qala týraly estelikterin aıtyp berdi, dep habarlaıdy QazAqparat.
«Ózim Taldyqorǵanǵa 2001 jyly alǵash kelgenmin. Sol kezde Taldyqorǵannyń qandaı bolǵany áli de kóz aldymda. Qazir kóp adam Taldyqorǵanǵa kelgende qalany tanymaı jatady. Onyń ornalasqan jeri de keremet, jer jánnaty – Jetisýdyń ortalyǵy, ondaı qalanyń jaman bolýy múmkin emes. Qanshama qarjy bólindi, Elbasy kómektesti, qazir de Qasym-Jomart Kemelulynyń qoldaýymen birtalaı jaqsy is atqarylyp jatyr», - dep jaýap berdi A. Batalov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda tilshi suraǵyna.
Ákimniń aıtýynsha, sol kezdegi halyq sany 97-98 myń bolsa, qazir 200 myńǵa jetken.
«Birqatar óndiris, turalap qalǵan zaýyttar qaıta qalpyna kelip, jumys istep jatyr. Qanshama shaǵyn jáne orta bıznes mekemeleri bar. Salystyrmaly túrde, ShOB ónimderdiń baǵasy sol kezde 2,5 mlrd teńgege baǵalansa, qazir 280 mlrd teńgege jetti. Jańa kósheler abattandyryp, jańa úıler, shaǵynaýdandar salyndy. Árqashan maqtanyshpen aıtatyn teatrymyz bar, Saltanat saraıy bar, Til saraıy bar, sport saraılary salynyp jatyr. Kelesi aıdyń aıaǵynda Olımpıada oıyndaryn ótkizýge jaraıtyn úlken Sý saraıyn iske qosaıyn dep jatyrmyz. Odan basqa qanshama mektep, aýrýhanalar salyndy. Qalamyzdaǵy kópbeıindi aýrýhana eń zamanaýı 5 aýrýhananyń qataryna kiredi. Sondyqtan, kelińizder, Taldyqorǵannyń 20 jylda qalaı ózgergenin kórińizder, biz sizderge sonyń bárin kórsetýge ázirmiz», - dedi Amandyq Batalov.
Eske sala keteıik, búgin QR Prezıdenti janyndaǵy Ortalyq kommýnıkatsııalar qyzmetinde «Memleket basshysynyń tapsyrmasy aıasynda Almaty oblysynyń áleýmettik-ekonomıkalyq damýy týraly» onlaın baspasóz konferentsııasy ótip jatyr.
