Taldyqorǵannyń ortalyq alańy jańarady
TALDYQORǴAN. QazAqparat - Aldaǵy ýaqytta Taldyqorǵan qalasyndaǵy ortalyq alańda jeti sýburqaq ornatylyp, qalanyń kórkin kirgizetin bolady, dep habarlaıdy QazAqparat tilshisi.
Bul rette alańda turǵan eki sýburqaqtyń qazirgi stıli saqtala otyryp jańartylady, sondaı-aq jańa sýburqaqtar salynady. Qandaı sýburqaqtar ornatý qajet, jumys qashan bastalady, qurylys barysynda qandaı jańa tehnologııalar qoldanylady degen saýaldarǵa oblys ákimi Amandyq Batalov ótkizgen jıynda jaýap berildi. Jıynǵa Qazaqstan Sáýletshiler odaǵynyń tóraǵasy, elimizdiń eńbek sińirgen sáýletshisi, professor Aqmyrza Rústembekov bastaǵan sáýletshiler men jobalaýshylar qatysty.
Kezdesýge kelgenderdiń aıtýynsha, sýburqaq ornatý barysynda osyndaı nysandar salý kezinde álemde keńinen qoldanylatyn ınnovatsııalyq tehnologııalar paıdalanylady.
Túrli usynystar men pikirlerdi tyńdaı kele, oblys basshysy alańdy jańartý barysynda onyń tarıhı mańyzy men qundylyǵyn eskere otyryp jalpy kontseptsııasyn saqtaý qajettigin aıtty. Bul taıqazandy sýburqaqqa da qatysty. Músinshiler men sáýletshilerge onyń búgingi keıpin saqtaı otyryp jańǵyrtýdyń búge-shigesine deıin oılastyrý tapsyryldy.
Jıyn sońynda ortalyq alańnyń bolashaqtaǵy kelbetin tanystyrǵan beınerolık kórsetildi. Barlyq jańǵyrtý jumystary aıaqtalǵannan keıin jaryqty ári áýendi, qurǵaq, kóbikti, búrký júıesi bar - jalpy jeteýi jeti túrli sýburqaq oblys ortalyǵynyń ajaryn burynǵydan da asha túsetin bolady.
