Taldyqorǵannyń mektep túlekteri kólik apatyna túsip, jansaqtaý bóliminde jatyr
TALDYQORǴAN. QazAqparat - Almaty oblysynda mektep túlekteri mingen jeńil kólik jol apatyna tústi. Zardap shekkenderdiń ekeýi jansaqtaý bóliminde jatyr, dep habarlaıdy QazAqparat tilshisi.
Oqıǵa 25 mamyr kúni sońǵy qońyraýdan keıin, Almaty-Taldyqorǵan tasjolynyń Balpyq bı men Baqtybaı aýylynyń arasynda bolǵan.
Dárigerlerdiń sózinshe, túski saǵat bir shamasynda 2001-2002 jyly týǵan 4 adam aýrýhanaǵa jetkizilgen. Olardyń úsheýi bir mekteptiń túlegi. Kólik tizgininde solardyń biri bolǵan. Qazir eki naýqas jansaqtaý bóliminde jatyr. Biriniń jaǵdaıy aýyr, arnaıy apparattyń kómegimen tynys alýda. Onyń moıyn omyrtqasy synyp, julynyna zaqym kelgen. Birden ota jasalǵan.
«Omyrtqasy ornyna qoıyldy. Biraq áli nátıje joq. Naýqastyń jaǵdaıy aýyr. Ekinshi naýqastyń san súıegi synǵan. Tobyqtary synǵan. Bir-eki kúnde oblystyq aýrýhanaǵa aýystyrylyp, operatsııa jasalady», - dedi Kóksý aýdandyq aýrýhanasynyń dárigeri Shyńǵys Rahımov.
Al zardap shekken ózge eki jas jaraqattarynyń jeńil bolýyna baılanysty úılerine jiberilgen.
«Kólik apatyna túsken úsh bala bizdiń mekteptiń bıylǵy túlekteri. Olardyń ata-analaryna eskertilgen. Balalaryńyzǵa qarańyzdar, qazir olardyń alyp-ushyp otyrǵan ýaqyty dep te aıtyldy. Endi biz amandyǵyn ǵana tilep otyrmyz. Anyqtamalaryn ákep berdi, emtıhandarynan bosatylady, olardy saýyqqannan keıin tapsyrady», - dedi Taldyqorǵan qalasyna qarasty Erkin aýylyndaǵy №11 mekteptiń dırektory Gúlbarshyn Beısekenova.
