Taldyqorǵannyń mektebi áleýmettik jelide taraǵan aqparatqa túsinik berdi
TALDYQORǴAN. QazAqparat - Taldyqorǵan qalasyndaǵy №12 mekteptiń basshylyǵy áleýmettik jelide taraǵan aqparatqa túsinik berdi. Olardyń aıtýynsha, mekteptiń tóbesinen sý kóktem kezinde aqqan. Al 11 synyptyń oqýshylarynan lınoleýmǵa aqsha jınaý týraly áńgime múldem bolmaǵan, dep habarlaıdy QazAqparat tilshisi.
«Áleýmettik jelilerde tóbeden sý aqqan dep kórsetilgen ashana osy. Iá, biz jasyrmaımyz. Bizde bıyl kóktem aıynda ondaı jaǵdaı boldy. Biraq, jazda qatty jel kezinde bizdiń mekteptiń shatyry ushyp ketti. Sol kezde jasalǵan jumystardyń nátıjesinde mekteptiń tóbesinen sý aqpaıtyn boldy», dedi bilim shańyraǵynyń tárbıe isi jónindegi meńgerýshisi Indıra Ahmetova.
Sondaı-aq áleýmettik jelilerde dál osy mektep 11-synyp oqýshylarynyń ata-analarynan lınoleýmge 5 myń teńgeden aqsha jınaýdy talap etkendigi jóninde jarııalanǵan. Bilim mekemesiniń dırektory birden 11-shi «V» synybynyń muǵalimin shaqyryp, jýrnalıstke osy jaıt boıynsha túsinik berýin surady. Bir qyzyǵy áleýmettik jelide taraǵan aqparatta naqty qaı 11 synypta lınoleýmge aqsha jınap jatqany jazylmaǵan bolatyn.
«Bizdiń 11-shi «V» synybynan lınoleýmge ata-analardan aqsha jınady degen aqparat tarap jatyr. Bizde ata-analarmen jınalys boldy, biraq ol jerde esh ýaqytta aqsha jınaý jóninde sóılesken emespiz. Jáne taǵy bir aıtqym keletini, bizge lınoleým múldem qajet emes. Mekteptiń óz lınoleými bar», - dedi 11 synyptyń muǵalimi Gúlnár Tashtenova.
Aıta ketý kerek, áleýmettik jelilerde taraǵan sýrette mektep ashanasynyń tóbesinen sý aǵyp, japsyrmalary túsip jatyr. Alaıda búgin ondaı kórinis baıqalmady. Ashana tóbesi bútin. Tek qabyrǵanyń kishkentaı tusy tóbeden aqqan sý saldaryn sarǵaıyp qalypty.
