Taldyqorǵannyń kireberisi jańartylady
TALDYQORǴAN. QazAqparat - Taldyqorǵannyń kireberisin jańartý josparlanýda. Arkanyń jobasy oblys ákimine tanystyryldy, dep habarlaıdy QazAqparat tilshisi.
Biraq óńir basshysy atalǵan jobany túgeldeı qaıta aýystyrý qajettigin aıtty. Sondaı-aq, kezdesý barysynda qalany jáne basqa da mańyzdy nysandardy kórkeıtý jobalary da tanystyryldy.
«Kez kelgen qurylysty júrgizgende, jobany daıyndaý barysynda eń aldymen sáýlet-qurylys talaptaryna súıenińizder. Egjeı-tegjeıli jospardy umytýǵa bolmaıdy. Qurylys syzyǵy, qyzyl syzyq - munyń bári jaı ǵana termınder emes, qurylystyń durys, sapaly jáne úılesimdi salynýynyń negizi», - dedi A. Batalov.
Sonymen qatar, óńir basshysy gazdandyrý boıynsha naqty tapsyrma berdi. Mamyrda Taldyqorǵannyń birneshe úıine tabıǵı gaz qosylady dep josparlanýda.
«Sizder qaı úıler birinshi bolyp qosylatynyn qazirden bilýlerińiz kerek. Ol úshin jurtshylyqpen kezdesip, jıyn ótkizip, tarıf týraly, qosylýdyń quny jaıly áńgimelesý qajet. Aldaǵy gazdandyrý isi týraly turǵyndardyń barlyq suraqtaryna naqty ári tolyq jaýap berý úshin qoldaryńyzda barlyq esep-qısap, naqty aıqyn tsıfrlar bolýy tıis», - dedi oblys ákimi.
Aıta ketý kerek, Almaty oblysynyń ákimi Amandyq Batalovqa Taldyqorǵan qalasynyń kóliktik ınfraqurylymyn odan ári damytý, oblys ortalyǵyn gazdandyrý barysyn, sol sııaqty abattandyrý sharalary jaıly josparlary tanystyrylǵan bolatyn.
