Taldyqorǵannyń ákimdigi aıaldama belgilerine qatysty túsinikteme berdi
TALDYQORǴAN.QazAqparat - Taldyqorǵan qalasynyń ákimdigi aıaldama belgileriniń jappaı alynyp jatqanyn joqqa shyǵardy, dep habarlaıdy QazAqparat tilshisi.
Ákimdiktiń aıtýynsha, joǵalyp ketken jol belgileri gaz qubyryn tartý kezinde alynyp tastalǵan. Biraq tıisti jumystar júrgizilgennen keıin baǵanalar qaıta ornatylǵan.
«Aıaldama belgileri alynyp tastalǵan bir-eki jaǵdaı boldy. Mysaly, Abylaı han men Rysqulov kóshesinde. Biraq tıisti jumystar júrgizilip bitkennen keıin, belgiler qaıta ornatyldy. Turǵyndar tarapynan jáne avtobýs júrgizýshilerinen osy jaıtqa baılanysty shaǵym túsken joq. Al júrgizýshilerge keler bolsaq, 22 qańtar men 18-shi aqpan aralyǵynda «Avtobýs» sharasy júrgizilýde. Jergilikti polıtsııa qyzmetkerleri jol erejesin buzǵan avtobýs júrgizýshilerine tıisti shara qoldanyp jatyr», dedi Taldyqorǵan qalalyq ákimdiginiń jolaýshylar kóligi jáne avtomobıl joldary bóliminiń sektor meńgerýshisi Qýat Qanıet.
Aıta ketý kerek, Taldyqorǵannyń avtobýs júrgizýshileri «aıaldamada belgi bolmaǵandyqtan ol jerge toqtaǵanymyz úshin aıyppul tólep jatyrmyz» dep narazylyq bildirgen.
