Taldyqorǵannyń 24 jastaǵy turǵynyna donor tabylmaı jatyr
TALDYQORǴAN. QazAqparat - Taldyqorǵandyq Bıjamal Eńsebaeva qalyń kópshilikten kómek suraıdy. 24 jastaǵy Bıjamaldyń qos búıregi birdeı isten shyqqandyqtan oǵan donor qajet, dep habarlaıdy «QazAqparat» tilshisi.
Naýqastyń jaǵdaıy kúnnen-kúnge nasharlap barady. Búırek álsizdiginen qan qysymy jıi kóterilip, talyp qalatyn jaǵdaıǵa jetken. Ol kúni keshe ǵana qalalyq kópsalaly aýrýhananyń jansaqtaý bóliminde jatyp, beti beri qarady. Endi boıjetkenniń ómiri gemodıalez apparatyna (bul qandy búırekten tys tazartý ádisteriniń biri) táýeldi.
Al Bıjamal Esenbaevanyń anasynan basqa jaqyn týysy joq. 63 jastaǵy anasy donor bolýǵa nıetti. Alaıda, densaýlyǵy jaramaıdy. Eger ol donor kezegine tursa, birneshe jyl kútýi qajet.
Bıjamaldy emdegen dáriger-nefrelog Farıda Ableeva ýaqyt ozdyrmaı naýqastyń búıregin aýystyrý qajet dep otyr. Sebebi, qazir Bıjamal endi ǵana bastaǵan gemodıalezdiń ózin óte aýyr qabyldaýda. Qan qysymy kóterilip, naýqas qatty qınalady. Keıde qan qysymy 280-ge deıin kóteriledi. «Bıjamaldyń bala kúninen búıregi aýyrady. Derti asqynyp, búginde oǵan termınaldy búırek jetispeýshiligi (termınalnaıa pochechnaıa nedostatochnost) dıagnozy qoıylyp otyr. Ózderińiz bilesizder búırekti satyp alýshyǵa jáne satýshyǵa elimizde jaza qatań. Bes jylǵa deıin sottalady. Sondyqtan Bıjamalǵa óz erkimen búıregin beretin donor tabylsa», - deıdi dáriger.
