Taldyqorǵanǵa shet elden kelgen 43 jolaýshydan koronavırýs anyqtalmady
TALDYQORǴAN.QazAqparat - Birikken Arab Ámirlikterinen Taldyqorǵanǵa ushyp kelgen 43 jolaýshydan koronavırýs indetine alynǵan synama teris nátıje kórsetti, dep habarlaıdy QazAqparat tilshisi.
«Taldyqorǵandaǵy «Merýert» qonaq úıine ornalastyrylǵan 43 adamnyń barlyǵynyń koronavırýsqa alynǵan synamasy teris nátıje kórsetti. Erteń ne bolmasa kelesi kúni olar bizdiń qaladan qaıtady», - dep jazdy Taldyqorǵan qalasy ákiminiń baspasóz qyzmetiniń hatshysy Nur Qanatuly Facebook -tegi paraqshasynda.
Esterińizge sala keteıik, keshe 11 sáýirde Birikken Arab Ámirlikterinen Taldyqorǵanǵa 135 jolaýshysy bar ushaq túngi saǵat 21:30-dar shamasynda ushyp keldi. Olar Taldyqorǵan qalasyndaǵy «Merýert» qonaq úıi men Tekelidegi shıpajaıǵa ornalastyrylǵan.
Barlyǵynyń densaýlyǵy tekserilip jatyr.
Nur Qanatulynyń tilshimizge bergen aqparatyna sáıkes, 43 jolaýshy polıtsııa, sanıtarııa mamandarynyń qadaǵalaýymen aldaǵy 1-2 kúnniń ishinde úılerine jetkiziledi.
