Taldyqorǵanǵa Reseıdiń kóshpeli haıýanattar baǵy keldi
TALDYQORǴAN. QazAqparat - Taldyqorǵanǵa Reseıdiń Pıatıgorsk qalasynan kóshpeli haıýanattar baǵy keldi, dep habarlaıdy Qazaqparat tilshisi.
Kóshpeli zoobaqta 40-tan astam ań-qus bar. Olardyń basym bóligi qyzyl kitapqa engen janýarlar. Amýr jolbarysy, aq jolbarys, arystandar men aıýlar, qara tústi qasqyr, pýma men sileýsinder taldyqorǵandyqtardy erekshe tánti etti. Al onyń basty sebebi oblys ortalyǵynda haıýanattar baǵy joq. 
Jyljymaly haıýanattar baǵyn uıymdastyrýshylardyń basty maqsaty halqy kóp, biraq janýarlar áleminen syr shertetin zoobaǵy joq eldi-mekenderdi aralaý. Jalpy Pıatıgorsk haıýanattar baǵy Qazaqstan aýmaǵyn 5 jyldan beri aralap keledi.
Al Zoobaq ákimshileri sapar barysynda jergilikti turǵyndardy ýaqytsha nemese turaqty jumysqa ornalastyrýda. Máselen Alına Saıtovanyń Taraz qalasynan birge kele jatqanyna 7 aı boldy. Aılyq tabysy 50 myń teńge. Halyq neǵurlym kóp kelse, tabysy da eselene túsedi.
Taldyqorǵandyq Eldos Naýryzbaı da átkenshek qyzmetkeri bolyp ornalasty. Ázirshe kúnine tabatyny 1500 teńge. Jumys kóńilinen shyqsa, ary qaraı birge júre bermek. Kóshpeli haıýanattar baǵynda jınalǵan jurt janýarlardy tamaqtandyryp, sýretke túsý múmkindigine ıe. Úlkenge de, kishige de shat-shadyman kóńil syılaǵan olar Taldyqorǵanda 3 apta aıaldamaq.
Odan keıin Úsharal qalasy, ary qaraı Shyǵys Qazaqstanǵa jol tartpaq.
