Taldyqorǵandyqtar jylý energııasyna 45 mln teńge artyq tólem jasaǵan
TALDYQORǴAN.QazAqparat - Almaty oblysynda monopolıster óńir turǵyndarynan kórsetilgen qyzmet úshin negizsiz aqy alǵan, - dep habarlaıdy QazAqparat tilshisi.
«Almaty oblysy prokýratýrasynyń zerdeleýi nátıjesinde Taldyqorǵan qalasynyń 31 myń abonentine jylý energııasyn qoldanǵany úshin 45 mln. teńgeden asa kommýnaldyq tólemaqy negizsiz qosylǵan. Prokýrorlyq qadaǵalaý aktisin qaraý qorytyndysy boıynsha 1 tamyzdan bastap artyq tólengen kommýnaldyq tólemder turǵyndarǵa tómendetilgen tarıf túrinde qaıtarylady», - delingen Almaty oblysy prokýratýrasynyń baspasóz qyzmeti taratqan aqparatta.
Sonymen qatar, «Úshqońyr ırrıgatsııa» MQK Qarasaı aýdanynyń 12 myń sý tutynýshylarynan sýmen jabdyqtaǵany úshin 50% mólsherde aqyny aldyn ala alyp otyrǵan.
«Osy talap úlgilik sharttarda da bekitilgen. Atalǵan tólem sýdy bergennen keıin tólenetinin eskere otyryp, oblys prokýratýrasy sýmen jabdyqtaýdyń úlgilik sharttaryn tabıǵı monopolııalar salasyndaǵy zańnamaǵa sáıkestendirý úshin qadaǵalaý aktisin engizdi»,-delingen vedomstvonyń habarlamasynda.
