Taldyqorǵandyqtar Jambyl teatry ujymynyń ónerin tamashalaýda
TALDYQORǴAN. QazAqparat - «Taraz ǵasyrlar kýási» degen ataýmen Taldyqorǵanda Jambyl oblysynyń mádenıet kúnderi aıasynda is-sharalar ótýde.
Oblystyq mádenıet saraıynyń foıesinde ár kelýshi Tarazdyń ejelgi tarıhymen tanysa aldy. Jambyl oblysynyń tarıhı-ólketaný murajaıynyń qyzmetkerleriniń munda ákelgen qyzyqty ekspontattary az emes.
Tarazdyń ortalyǵynda ejelgi qalashyqty qazý jumystary júrgizilýde. Qarajat bólinip, arnaıy baǵdarlama qabyldandy. Tabylǵan artefaktilerdiń keıbireýi kórmede tanystyryldy.
Aıtý kerek, mádenı almasý aıasyndaǵy barlyq sharalar tegin ótip jatyr. Jambyl oblysynyń mádenıet kúnderi qazannyń ekisine deıin jalǵasady. Almaty oblysynyń da Jambyl oblysyna barýy josparlanyp qoıdy.
Jambyl teatrynyń ujymy oblys ortalyǵy turǵyndaryn Bıken Rımova atyndaǵy drama teatr sahnasynda teatrlyq qoıylymdaryn sahnalaýmen qýantýda. Olardy tamashalaýǵa jınalǵan jurtshylyqtyń qarasy da kóp boldy. Kórermen nazaryna Sh.Aıtmatovtyń «Ana Jer Ana» shyǵarmasy boıynsha teatrlyq qoıylym usynyldy.
Bul spektakl taldyqorǵandyq kórermender úshin Jambyl oblysynan kelgen qonaqtardyń jalǵyz syıy emes. Jalpy, oblys ortalyǵynyń turǵyndary barlyǵy úsh spektakldi tamashalaı alady. Olardyń arasynda kishkentaı kórermenderge arnalǵan tosyn syı da bar.
«Búgin biz balalarǵa J.Omarovtyń «Qulynshaq» ertegisin, «Qyz Jibek» eposyn kórsetemiz. Shyǵarmashylyq qarym-qatynastardy budan keıin de jalǵastyramyz degen oıdamyn», - dedi Jambyl oblystyq drama teatrynyń kórkemdik jetekshisi Qýandyq Qasymov.
