Taldyqorǵandyqtar jaqsylyq jasap jarysýda
TALDYQORǴAN. QazAqparat - Almaty oblysynyń turǵyndary osy kúndergi sarshunaq aıazdarda bir-birine kómek qolyn sozyp, ıgi istermen aınalysýda. Máselen, qaladaǵy medıtsınalyq kolledjdiń stýdentteri aıaldamalarda turǵan halyqqa ystyq sháı úlestirse, shahardaǵy túrli avtoklýbtyń músheleri adamdardy úılerine tegin jetkizýde, dep habarlaıdy QazAqparat tilshisi.
«Kún sýysa da, kóńilderińiz sýymasyn!» degen tilekpen bolashaq medıtsına qyzmetkerleri halyq kóp shoǵyrlanǵan jerlerde jáne aıazǵa qaramastan saýda jasap turǵan jandarǵa sháılaryn usyndy. Medıtsınalyq mekemeniń bilimgerleri osylaısha taldyqorǵandyqtarǵa jaqsy kóńil-kúı syılaýǵa tyrysýda. Jáne bul bastamalaryn ózge oqý oryndarynyń stýdentteri de qoldasa dep tileıdi.
Al oblys ortalyǵyna qarasty Erkin aýyldyq okrýginiń meshitinde «Jasylyq jasap jarysaıyq» atty top qurylyp, kómekke muqtaj jandarǵa qol ushyn sozýda. Olar otbasylyq jaǵdaıy tómen adamdarǵa kómir alyp berip, azyq-túlikpen qamtýda.
Osylaısha taldyqorǵandyqtar uıymshyldyqtyń úlgisin kórsetip, halyqtyń alǵysyna bólenýde. Qatty aıaz qala turǵyndaryn bir-birine jaqyndastyra tústi. Oblys ortalyǵynda úskirik aıaz áli de saqtalýda. Aýa temperatýrasy -30-35 gradýsqa deıin tómendeýde.
Aıta ketý kerek, Aqsý aýdandyq meshitinde de jaǵdaıy tómen 35 otbasyǵa un taratyldy.
