Taldyqorǵandyqtar qala kúnin bir aı boıy toılamaq
TALDYQORǴAN. QazAqparat - Taldyqorǵan kúni qyrkúıek aıynyń 4-i men 29-y aralyǵynda bir aı kóleminde toılanady, dep habarlaıdy QazAqparat tilshisi.
Mereke aıasynda túrli festıvalder, sporttyq sharalar, áleýmettik nysandardyń ashylýy, merekelik kontsertter josparlanǵan. Bul týraly Óńirlik kommýnıkatsııalar qyzmeti alańynda ótken baspasóz máslıhatynda Taldyqorǵan qalasynyń ákimi Dastan Shaltabaev málimdedi.
Qala ákiminiń aıtýynsha, bıylǵy merekeniń erekshelikteri óte kóp. Bastysy - qalaǵa kórik beretin tarıhı nysandardyń túbegeıli jańartylýy. Qyrkúıektiń sońyna deıin Іlııas Jansúgirov atyndaǵy mádenıet saraıy, ortalyq alańdaǵy sýburqaq, «Órken» sport kesheni tolyq jańalanyp, paıdalanýǵa beriledi. Al, 29 qyrkúıek kúni «Jastar» saıabaǵynda qala turǵyndaryna uzyndyǵy men eni 3 metr bolatyn merekelik tort pen pıtstsa taratylady.
Ár aptanyń senbi kúnderi «Kúz tartýy» aýylsharýashylyq ónimderiniń jármeńkesi uıymdastyrylady. Jasyl jelekti qalamyzdyń tazalyǵy da árqashan nazarda. Mereke boıy qala aýmaǵynda «Asar» uıymdastyrylyp, aıasynda tarıhı-mádenı eskertkishter, saıabaqtar men shaǵyn demalys oryndary, sondaı-aq aýlalar tazalanyp, qalpyna keltiriledi. Jastarǵa arnalǵan «Kóshbasshy-2018» jastar baıqaýy, «Jaıdarman» oıyndary, «Densaýlyq» festıvalderi ótip, úzdikter marapattalmaq. Dástúrli «Úzdik, úlgili» baıqaýy aıasynda top jarǵan taldyqorǵandyqtar anyqtalady.
Odan ózge «Kıno kúni», «Balalar álemi», «Saltanatty neke qııý rásimi» syndy sharalar da ótkiziledi.
«Qala kúni - taldyqorǵandyqtar taǵatsyzdana kútetin aıtýly mereke. Biz bul merekege tolaıym tabystarmen kelip otyrmyz. Elbasy saıasatynyń arqasynda Jetisýdyń bas qalasy kúnnen kúnge jańaryp, jarqyrap kele jatyr. Sonaý Taldyqorǵan oblys ortalyǵy bolǵan 2001 jyldaǵy jaǵdaı men qazirgi qalany múldem salystyra almaısyz. Ol kezdegi kóshpen birge men de kelgen edim. Sodan beri Taldyqorǵan men úshin óte ystyq, ári súıikti qalaǵa aınaldy. Buıyrsa, aldaǵy jyldary Taldyqorǵannyń oblys ortalyǵy bolǵan mereıtoıyn keń kólemde atap ótemiz. Sol kúnderdi birge tamashalap, Taldyqorǵannyń jetistikterine atsalysyp júrýge barshańyzdy shaqyramyn», - dedi Dastan Turarbekuly.
