Taldyqorǵandyqtar bir tonna kómirdi 20 myń teńgege satyp alýda
TALDYQORǴAN. QazAqparat - Taldyqorǵandyqtar bir tonna kómirdi 20 myń teńgege satyp alýda. Jergilikti jurtshylyq alypsatarlardyń oljasyna aınaldyq dep narazy, dep habarlaıdy QazAqparat tilshisi.
Turǵyndardyń sózinshe, bir ǵana Dánesh Raqyshev kóshesiniń boıyndaǵy qatty otyn satatyn qoımaǵa kúnine eki vagon kómir keledi eken. Biraq onyń rahatyn qarapaıym halyq emes, alypsatarlar kórip jatqanǵa uqsaıdy.
«13 myń teńgeniń kómirin amaldyń joqtyǵynan 20 myń teńgege satyp aldym. Sebebi úıde jaǵatyn otyn qalmady. Úıdiń ishi azynap ketti. Al qoımanyń aldynda birneshe saǵat turyp, bir qap kómir de ala almadym. Sebebi, azǵantaı kómir kelgenimen qarapaıym halyqqa buıyrmady», deıdi taldyqorǵandyq Sáken Sábıtov.
Birneshe tonna kómirdi qoımadan alyp, ony ýdaı baǵaǵa satatyn alypsatarlardyń saýdasy Taldyqorǵanda qyzyp tur. Al Muhıt esimdi turǵyn qalany sharlap kómir tappaı júrgenin aıtady. Sebebi kópbalaly ákeniń 20 myń teńgege kómir alýǵa shamasy kelmeıdi. Al qalalyq ákimdik bolsa, qatty otyn jetkilikti mólsherde jetkizilip jatqanyn aıtady.
«Kómir máselesi tek Taldyqorǵanǵa ǵana emes, búkil Qazaqstandaǵy jaǵdaı ǵoı. Qazirgi kúni Taldyqorǵan qalasy boıynsha kómirge eshqandaı muqtajdyq joq. 15-18 qańtar aralyǵynda bizdiń Taldyqorǵan qalasyna 357 vagon kómir kelgen. Al bir vagonda 69 tonna vagon kómir bolatynyn eseptesek, qandaı kezek bolýy múmkin ekenin bilmeımin. Bul jańaǵy kómir satýshylardyń ózderiniń máselesi bolyp sanalady», deıdi Taldyqorǵan qalasy ákiminiń baspasóz hatshysy Danııar Janys.
Alypsatarlardyń oljasyna aınaldyq degen turǵyndar kómir satatyn qoımalardyń basshylaryna tıisti shara qoldansa dep suraıdy.
Al sársenbi kúni Almaty oblysy boıynsha kún kúrt sýytady dep eskertý jarııalandy. Taldyqorǵannyń ózinde aýa temperatýrasy -30-35 gradýsqa deıin tómendeýi múmkin.
