Taldyqorǵandyqtar «Aıbyn» áskerı-patrıottyq jıynynyń jeńimpazdaryn qarsy aldy
TALDYQORǴAN. QazAqparat - Qazaqstan Respýblıkasy Qarýly Kúshteriniń 25 jyldyǵyna arnalǵan «Aıbyn» halyqaralyq áskerı-patrıottyq jastar jıynynda І oryndy ıelengen «Jetisý tarlandary» komandasyn Taldyqorǵan qalasynyń «Jastar» saıabaǵynda saltanatty túrde qarsy aldy, dep habarlaıdy QazAqparat.
Jeńimpazdardy týǵan-týystary, dostary men jaqyndary Almaty oblystyq Qorǵanys isteri jónindegi departament qyzmetkerleriniń uıymdastyrýymen ulttyq orkestrdiń áýenimen kútip aldy.
«QR Qarýly Kúshteriniń 25 jyldyǵyna oraı uıymdastyrylǵan «Aıbyn» jastar jıyny osy jyly halyqaralyq dárejede ótti. Oǵan «Jas ulan» respýblıkalyq áskerı mektepterinen, óńirlerdegi áskerı-patrıottyq klýbtardan, sondaı-aq Reseı Federatsııasy Orynbor prezıdenttik kadet ýchılışesinen barlyǵy 600-den astam tárbıelenýshi qatysty. Uıymdastyrylǵan jarystar ońaı bolmady, alaıda qyzyqty ótti. Fızıkalyq kúshti, rýhy bıik, bilikti jastardan quralǵan bizdiń komanda halyqaralyq deńgeıde ózderin joǵary dárejede kórsete bildi. Aldaǵy ýaqytta biz joǵary jetistikterge jetetinimizge senemiz», - dedi Almaty oblystyq Qorǵanys isteri jónindegi departament bastyǵynyń tárbıe jáne ıdeologııa jumystar jónindegi orynbasary Qýandyq Ádilbekov.
Eske salaıyq, Qaraǵandy oblysynda «Aıbyn» halyqaralyq áskerı-patrıottyq jastar jıyny óz máresine jetti. Almaty oblysynyń «Jetisý tarlandary» komandasy 16 óńirden kelgen qatysýshylardyń arasynan júldeli І oryndy ıelendi. Komandanyń ár múshesi arnaıy dıplommen, medalmen jáne baǵaly syılyqpen marapattaldy.
