Taldyqorǵandyq jýrnalıst respýblıkalyq baıqaýda top jardy
TALDYQORǴAN. QazAqparat - Almaty oblystyq «Jetisý» gazetiniń tilshisi Rıshad Turǵanbaev respýblıkalyq baıqaýda top jardy. Seıdahmet Berdiqulov atyndaǵy syılyq Jetisý jýrnalısine buıyrdy, dep habarlaıdy QazAqparat tilshisi.
Rıshad Turǵanbaevtyń respýblıkalyq baıqaýdaǵy bul alǵashqy jeńisi. Bilikti maman, kásibı jýrnalıst halyqqa sport salasyn nasıhattap, aıanbaı eńbek etýde. Ózindik qoltańbasy bar sport tilshisi «Qazaqstan barysy» syndy mártebesi joǵary dodalarda kommentator qyzmetin abyroımen atqaryp júrgen maman. Ol sońǵy 15 jyldan beri oblystyq «Jetisý» gazetinde tilshi bolyp isteıdi.
«Bala kezimnen sport jýrnalısi bolsam dep armandaıtynmyn. Qazaq sport jýrnalıstıkasynyń negizin qalaýshy Seıdahmet Berdiqulovtyń kóptegen kitaptaryn oqyp, sol kisige qarap boı túzeıtinmin. Talaı shákirtterdi ertken uly ustaz, sport jýrnalısteriniń ustahanasyna aınala bilgen eren tulǵanyń atyndaǵy syılyqqa ıe bolý, árıne men úshin orny bólek baqyt, mártebe», deıdi jeńimpaz Rıshad Turǵanbaev.
Seıdahmet Berdiqulov atyndaǵy syılyqtyń ıegeri atanǵan tilshi bul baıqaýǵa 10 jýyq maqalasyn jibergen. Basym bóligi - Rıo Olımpıadasynda jazylǵan materıaldar. 3 balanyń ákesi, Jetisý memlekettik ýnıversıtetiniń «jýrnalıstıka» mamandyǵynyń túlegi Rıshad alǵashqy eńbek jolyn ustazdyqtan bastaǵan. Almaty oblysy, Qaratal aýdanynyń týmasy týǵan jerinde birneshe jyl «Informatıka» pániniń muǵalimi bolyp, shákirt tárbıelegen.
Aıta ketý kerek, dástúrli túrde jyl saıyn uıymdastyrylyp kele jatqan Seıdahmet Berdiqulov atyndaǵy syılyq Rıshad Turǵanbaevtan ózge Ǵabıt Saparbekovke (Shymkent qalasy, «Ońtústik Qazaqstan» gazeti) buıyrdy. Al orystildi tilshiler arasynda júldeni Pavel Tsybýlın (Astana qalasy, «QazSport» telearnasy) qanjyǵasyna baılady.
Júldegerlerdi marapattaý rásimi aldaǵy kúnderi belgili bolady.
