Taldyqorǵandyq jýrnalıst halyqaralyq baıqaýdan júldemen oraldy
TALDYQORǴAN. QazAqparat - «Taldyqorǵan» qalalyq gazetiniń tilshisi Alma Ýrazaeva jeńimpaz atandy. Máskeýde ótken halyqaralyq baıqaýda jýrnalıstiń maqalasy úzdikterdiń qatarynan tabyldy, dep habarlaıdy QazAqparat tilshisi.
TMD elderi astanalary men iri qalalarynyń halyqaralyq assambleıasy uıymdastyrǵan baıqaý bıyl besinshi ret shymyldyǵyn túrdi. Atalǵan sharaǵa taldyqorǵandyq tilshi óz maqalasyn usynǵan. Jetisýdyń bas shahary jaıly jazylǵan jýrnalıstiń materıaly úzdik atanyp, birinshi dárejeli dıplommen marapattaldy. Atap aıtqanda, «Qaýipsiz qala» nomınatsııasyn jeńip aldy.
Alma Ýrazaeva orystildi jýrnalıst. Atalǵan basylymda sońǵy 15 jyldan beri eńbek etip keledi. Jeńimpazdyń halyqaralyq baıqaýdan júldemen oralýy basylymnyń 25 jyldyǵyna tamasha tartý boldy, deıdi áriptesteri. «Taldyqorǵan» gazetine 2 naýryz kúni 25 jyl tolady.
