Taldyqorǵandyq stýdentter qoǵamdyq tártipti saqtaýǵa atsalysýda
TALDYQORǴAN.QazAqparat - Taldyqorǵan qalasyndaǵy Іlııas Jansúgirov atyndaǵy Jetisý memlekettik ýnıversıtetiniń stýdentteri tártip saqshylarymen birlesip, oblys ortalyǵynyń qoǵamdyq oryndarynda tártip buzýdyń aldyn alý, qylmystardy boldyrmaý maqsatynda uıymdastyrylǵan reıdterge belsendi túrde qatysýda, dep habarlaıdy QazAqparat tilshisi.
Sharaǵa polıtseıler, ishki ásker sarbazdary jáne qoǵamdyq belsendi stýdentter jumyldyryldy. Atalǵan bastama 8 qyrkúıekten bastap, úsh aılyq merzimde júrgiziletin respýblıkalyq «Ýchaske» jedel aldyn alý is-sharasy aıasynda uıymdastyrylyp otyr.
«Bizdiń bastamamyzdy qoldaǵan stýdentterge alǵysymdy bildiremin. Sizderdiń mindetterińiz - qoǵamdyq oryndarda tártipbuzýshylyqty boldyrmaý, onyń aldyn alý. Degenmen, saqtyq sharalaryn umytpaý qajet. Biz ákimdikke polıtseılerdiń qoǵamdyq kómekshilerine tóleý maqsatynda bólingen qarjy esebinen belsendilik tanytqan stýdentterge aqy tóleý týraly usynys engizemiz. Sondaı-aq, qoǵamdyq belsendi bolyp kelip, qazirgi tańda polıtsııada qyzmet atqaryp júrgen jastar kóp. Endeshe, Sizderdiń qatarlaryńyzdan da tártip saqshylary shyǵady dep senemin. Reıd barysynda, eń aldymen, azamattardyń konstıtýtsııalyq quqyǵyn saqtaý qajettiligin esten shyǵarmańdar»,- dedi óz sózinde Almaty oblysy ІІD Jergilikti polıtsııa qyzmetiniń bastyǵy polıtsııa polkovnıgi Marat Kúshtibaev.
Sonymen qatar, oblystyq polıtsııa baspasóz qyzmetiniń habarlaýynsha, osyndaı sharalar jeltoqsan aıyna deıin jalǵasatyn bolady.
