Taldyqorǵandyq stýdent qyz avtomatty 34 sekýndta qaıta qurastyrdy

TALDYQORǴAN. QazAqparat - Taldyqorǵandaǵy Іlııas Jansúgirov atyndaǵy Jetisý memlekettik ýnıversıtetinde Otan qorǵaýshy kúni men Jeńis kúni merekesine arnalǵan saltanatty sherý ótti. Sharany atalǵan bilim ordanyń áskerı kafedrasy alǵash ret uıymdastyryp otyr, dep habarlaıdy QazAqparat tilshisi.

Merekelik keshte mektep oqýshylary men stýdentter óz sheberlikterin ortaǵa salyp, patrıottyq ánder shyrqady. Máselen, avtomatty bólshektep, qaıta jınaý jarysyna 18 adam qatysyp, qyzdar arasynda Іlııas Jansúgirov atyndaǵy JMÝ-ń 3 kýrs stýdenti Mádına Ibragımova 1 oryndy jeńip aldy. Ol 34 sekýnd ishinde avtomatty bólshektep, qaıta qurastyryp shyqty. Al jigitter arasynda bul sheberlikti 8 synyp oqýshysy Aıbar Qapalbaı 32 sekýndtyń ishinde kórsetti. Áskerı sala mamandarynyń aıtýynsha, negizgi normatıv boıynsha avtomatty bólshekteýge 12 sekýnd, ony qaıta jınaýǵa 23 sekýnd beriledi.

Jıynda ýnıversıtet rektory Qýat Baımyrzaev UOS ardagerleri men tyl eńbekkerlerine alǵys bildirip, jınalǵan qaýymdy Otan qorǵaýshy jáne Jeńis kúnimen quttyqtady.

Sharaǵa jınalǵandar aldynda Taldyqorǵan qalasyndaǵy 21/751 áskerı bólim desantshylary óner kórsetip, ýnıversıtet jastary kontserttik baǵdarlama usyndy.