Taldyqorǵandyq oqýshylar kınologtarǵa saıahattap bardy
TALDYQORǴAN. QazAqparat - Taldyqorǵan qalasyndaǵy Nazarbaev Zııatkerlik mektebiniń oqýshylary Almaty oblystyq ІІD Kınologııalyq qyzmet ortalyǵynyń jumysymen tanysyp qaıtty.
Shara «Otbasynyń shyǵarmashylyq kúni» jobasy aıasynda uıymdastyryldy, dep habarlaıdy QazAqparat tilshisi.
Balalardy kınologııalyq qyzmettiń qyzmetkeri polıtsııa maıory Erlan Mýsapırov qarsy alyp, qyzmettik ıtterdiń polıtsııa qyzmetkerlerine qandaı jaǵdaıda kómektesetini týraly aıtyp berdi. Jáne de tórt aıaqty kómekshilerdiń qatysýymen ótken arnaıy operatsııalardyń birin úlgi retinde keltirip, jattyǵýǵa qajetti quraldardy kórsetti.
Saıahat kezinde balalar kınologtardyń qyzmeti jáne ıtterdiń qandaı túrleri qoldanylatyny, olardy qalaı tamaqtandyryp, emdeıtini týraly maǵlumat aldy. Oqýshylar úshin nemis ovcharkasynyń qylmyskerdi ustaý barysy is júzinde kórsetildi. Osy tórt aıaqty polıtsııa kómekshileriniń basty qarýy, olardyń estý jáne ótkir ıis sezý qabiletteri, qýatty azý tisteri bolyp tabylady.
«Kınolog mamandyǵy - óte keremet mamandyq. Tabysty jumys úshin kınologtarǵa qýatty belsendilik pen kúsh-jiger qajet, sol ýaqytta shydamdy bolyp, ıtke óziniń kóshbasshylyq qabiletin kórsete alý kerek. Ol ózimen birge jumys jasaıtyn ıttiń tuqymy jaıly, onyń eresheligi men minezin jaqsy bilýi kerek. Men ıtterdi 7 aıynan bastap úıretý kerektigin jáne de kınologııalyq ortalyqta ár ıt óziniń minezine baılanysty belgili áreketke úıretiletinin bildim. Mysalǵa, laqap aty Rem atty ıt qylmyskerdi izi boıynsha izdese, Foks atty ıt tek qana esirtki zattaryn izdeıdi»,- dep bólisti óziniń saıahattan alǵan áseri týraly 7 «A» synybynyń oqýshysy Ajar Abıtaeva.
Kezdesý sońyna qaraı balalar ózderin qyzyqtyrǵan suraqtaryn qoıdy. Saıahat úshin alǵystaryn bildirip, polıtsııa qyzmetkerlerine jáne onyń kómekshilerine tabys tiledi.
