Taldyqorǵandyq oqýshy hımııa páninen halyqaralyq olımpıadada jeńimpazy atandy
ASTANA. QazAqparat - Taldyqorǵandyq oqýshy Anton Morgýnov Taılandta hımııa páninen ótken 49-ynshy halyqaralyq olımpıadada birinshi orynǵa ıe boldy, dep habarlaıdy «Nazarbaev zııatkerlik mektebi» AQ baspasóz qyzmeti.
Taldyqorǵan qalasyndaǵy fızıka-matematıka baǵytyndaǵy Nazarbaev zııatkerlik mektebiniń 12 synyp oqýshysy Anton Morgýnov hımııa páni boıynsha kóptegen respýblıkalyq jáne halyqaralyq olımpıadalardyń jeńimpazy. Byltyrǵy jyly hımııa páni boıynsha Grýzııada ótken 48-inshi halyqaralyq olımpıadada Anton kúmis júlde ıegeri atandy. Bıylǵy jyldyń sáýir aıynda Astanada ótken 51-inshi halyqaralyq Mendel olımpıadasynda da jeńiske jetti. Sol kezde Antonǵa M.V.Lomonosov atyndaǵy Máskeý memlekettik ýnıversıtetiniń bilim granty tabystalǵan bolatyn.
Nakhon Pathom qalasynda ótken olımpıadaǵa 76 elden kelgen 300-den astam oqýshy qatysty.
Olımpıada nátıjesi boıynsha tórt oqýshydan turatyn Qazaqstan qurama komandasy bir altyn jáne úsh qola júldege ıe boldy.
