Taldyqorǵandyq múmkindigi shekteýli jandar sheberlik saǵatyn ótkizdi
TALDYQORǴAN. QazAqparat - Taldyqorǵandyq múmkindigi shekteýli jandar sheberlik saǵatyn ótkizdi. Qolóner sheberleri óz bilgenderin jastarǵa úıretýde. Osy maqsatta olar Taldyqorǵandaǵy servıs jáne tehnologııa kolledjine baryp, tájirbıelerimen bólisti, dep habarlaıdy QazAqparat tilshisi.
Sheberlik saǵatyn aımaqtyq «jumyspen qamtýǵa járdemdesý qory» uıymdastyrǵan.
«Qolóner sheberligin múgedek jandarǵa úıretý mańyzdy. Máselen, bul sal aýrýyna shaldyqqan adamdardyń aqyl-oı túısigin damytýǵa múmkindik beredi. Biz osy maqsatta Eńbekshiqazaq aýdany men Taldyqorǵan qalasynda arnaıy semınarlar uıymdastyrǵanbyz. Búginde olar endi jastarǵa bilgenderin úıretip jatyr. Bul kedergisiz keleshek baǵdarlamasyn júzege asyrýdaǵy bir qadam dep esepteımin», deıdi Taldyqorǵan aımaqtyq «Jumyspen qamtýǵa járdemdesý» qorynyń dırektory Svetlana Sádýaqasova.
Qor múgedek jandardy eńbekpen qamtý maqsatynda jyl saıyn 25 adamdy qolónerge baýlıdy. Sońǵy 3 jylda 75 azamat oqýdan ótken. Baǵdarlamada kıiz basý, ulttyq naqyshtaǵy dorba, qalta telefonyn salatyn jáne kúndelikti turmysta qoldanatyn buıymdar jasaý tehnologııasyn meńgerý sharalary qamtylǵan.
Mamandardyń aıtýynsha, qazir qoldan jasalǵan buıymdarǵa suranys kóp. Sondyqtan sapaly ónimge tapsyrys jetkilikti. Qoǵamdyq birlestiktiń endigi maqsaty - múgedek jandardan bólek, bul jumysqa ıkemi bar stýdentterdi tartý bolyp otyr.
