Taldyqorǵandyq model Frantsııada ótken baıqaýda jeńimpaz boldy
TALDYQORǴAN. QazAqparat - Taldyqorǵandyq model Frantsııada ótken baıqaýda jeńimpaz boldy. Alǵash ret Almaty oblysynyń sán mektebi «DA models»-tiń oqýshylary «World Asia Beauty 2017» jáne «Universe Beauty 2017» syndy sán kórsetilimi men óneri ushtasqan sulýlyq baıqaýlarynda júldeli oryndar alyp qaıtty. Olar 5 jasar Kıbraeva Azalııa 2-shi Vıtse Mıss atansa, 9 jasar Hasen Amına 2-shi oryndy jáne Tarasenko Kıra 3-shi oryndy ıelendi, dep habarlaıdy QazAqparat oblystyq óńirlik kommýnıkatsııalar qyzmetine silteme jasap.
Brıfıng barysynda málim bolǵandaı, «DA models» sán mektebi 2017 jyldyń sáýirinde ashylǵan. Qazirgi tańda mektepte 5-25 jas aralyǵyndaǵy 23 oqýshy bar. Jattyǵýlar І.Jansúgirov atyndaǵy mádenıet úıinde ótedi. Onda oqýshylar jas erekshelikterine qaraı birneshe topqa bólingen.
Mekteptiń maqsaty balalardyń shyǵarmashylyq múmkindikterin damytý, durys soıleý mánerin qalyptastyrý , denini qalapty jaǵdaıda ustaýdy jáne kameramen jumys jasaýdy úıretý.
«Taldyqorǵanda sán mektebiniń ashylǵanyna az ýaqyt bolsa da 14 jasar model Asqarova Dana shilde aıynda Frantsııanyń Lakost qalasynda ótken «World Asia Beauty 2017» baıqaýynyń «Super Model Universe Beauty 2017» nomınatsııasy boıynsha Gran-prı jeńip aldy. Bul baıqaý jyl saıyn álemdik sán álemindegi ańyz adam Per Kardenniń qoldaýymen ótkiziledi. Festıval halyq arasyndaǵy, ásirese, ártúrli elderdiń balalary arasyndaǵy dostyq qarym-qatynastar men mádenı almasýlardy nyǵaıtý maqsatynda jáne balalardyń dinı kózqarastary men ulttaryna qaramastan ótedi. Oǵan 100-den astam eldiń ókilderi qatysady», - dedi «World Beauty» Almaty oblysy boıynsha dırektory Kısapova Alııa Askarqyzy
Sán mektebiniń basty maqsaty Almaty oblysynyń jas ónerpazdaryn halyqaralyq dárejede tanymal etý.
