Taldyqorǵandyq qoldan jasalǵan dronyn 300 myń teńgege satty
TALDYQORǴAN. QazAqparat - Taldyqorǵandyq Andreı Ermılov pen Aleksandr Dadochkın kvadrokopter qurastyryp, ony 300 myń teńgege satty, dep habarlaıdy QazAqparat tilshisi.
Jetisýlyq tehnıkterdiń bul týyndysy egis alqaptaryn, baý-baqshalardy dárileýde, izdestirý jumystarynda jáne geologııalyq barlaýda taptyrmas qural. Ushý apparatynyń artyqshylyǵy aýyr salmaq kóterýge qaýqarly. Máselen, olardyń 300 myń teńgege satylyp ketken kvadrokopteri 10 kg zat alyp usha alady. Ónertapqyshtar tehnıkalyq kórsetkishteri qazirgi qoldanystaǵy kvadrokopterlerden esh kem emes deıdi. Sondyqtan bul ushý apparattaryn turmysqa keńinen paıdalanýǵa bolatynyn aıtady. Іsker azamattar bul jobalaryn «Damý» qorynyń «Jańa bıznesti ashýǵa qoldaý» baǵdarlamasy aıasynda júzege asyrdy. Ázirshe tek eki nusqasyn synaqtan ótkizgen tehnıkter qarjylaı qoldaý tapsa basqa túrlerin de qurastyrýǵa nıetti. Qazirgi tańda sheberler óz eńbekterin patenttep alýdy josparlap otyr.
