Taldyqorǵandyq keıýana páter kezeginiń jyljymaıtynyna narazy
TALDYQORǴAN. QazAqparat - Taldyqorǵandyq qarııanyń úı kezeginde turǵanyna 10 jyl boldy. 74 jastaǵy Bıshiken Belgenova birinshi top múgedegi retinde 2007 jyly baspana kezegine turǵan. Sodan beri páterden-páterge kóship, jan baǵýda. Alaıda qazirgi páteriniń ıesi úıin satamyn degen soń keıýana sharasyz qaldy, dep habarlaıdy QazAqparat tilshisi.
Qarııa «Kúmis alqa» ıegeri retinde de esh jeńildiktiń joqtyǵyna qyńjylady. Bıshiken ájeı otaǵasy Aıtken ekeýi balalaryna salmaq salǵysy kelmeıdi.
«Ieleri satamyz dep otyr. Kimniń esigin taqyldatamyn. Baratyn jer de bolmaı qaldy. Sózdiń shynyn aıtqanda, ákimdik bolsyn, «Nur Otan» bolsyn dáý palatka bersin. Soǵan otyramyn», - deıdi taldyqorǵandyq Bıshiken Belgenova.
Al ákimdiktegiler baıaý da bolsa qart ananyń kezegi jyljyp jatqanyn aıtady. Qalalyq turǵyn úı-kommýnaldyq sharýashylyǵy bólimi turǵyn úı sektorynyń meńgerýshisi Oljas Allabergenniń aıtýynsha, qarııa 2007 jyly kezekke 370-shi bolyp turǵan. Qazirgi kezegi - 273. Demek on jylda kezek 97 adamǵa jyljyǵan.
Osyndaı qarqyn bolsa Bıshiken ájeı óz úıin 30 jyldan keıin alýym ǵajap emes dep ýaıymdap otyr. Bir ǵana jubanysh - balalary, nemereleri kelip, úı sharýashylyǵymen kómektesip turady.
Aıta keteıik, Taldyqorǵanda baspana kezeginde 15 myńǵa jýyq azamat tur. Olardyń ishinde 1263 adam 1-shi jáne 2-shi top múgedekteri.
