Taldyqorǵandyq qańǵybas eki aıaǵynan aıyryldy
TALDYQORǴAN.QazAqparat - Taldyqorǵanda qańǵybastardyń sany artýda. Jańa jyldan beri 29 adam arnaıy beıimdeý ortalyǵyna jetkizilgen. Onyń bireýiniń aıaǵy úsip qalǵan, dep habarlaıdy QazAqparat tilshisi.
Qazir 50 jastaǵy azamatqa ota jasalyp, eki aıaǵynyń tizeden tómen bóligi kesilgen.
«Jańa jyldan keıin bizge tústi. Birden aýrýhanaǵa apardyq, eki aıaǵynyń tizeden tómen bóligi úsip ketken. Kesýge týra keldi. Qazir naýqas bizde beıimdeý ortalyǵynda jatyr. Jańadan kelgen adamdarǵa medıtsınalyq tekserýler júrgizip jatyrmyz», - deıdi turǵylyqty meken-jaıy joq tulǵalarǵa arnalǵan beıimdeý ortalyǵynyń dırektory Gúlnáz Tileýberlınova
Qazir mamandar qańǵybastar kóptep júretin jerlerge arnaıy baryp, olardy ortalyqqa jetkizýmen aınalysýda. Qys ýaqytynda bul mekemeni panalaıtyndar sanynyń kúrt ósýi qalypty jaǵdaı. Jalpy bul jerge keletin azamattardyń taǵdyry árqıly. Oǵan qosa ótken jyldan bastap túzetý mekemelerinen bosap shyqqan qylmyskerlerdiń turǵylyqty mekenjaıy bolmasa osy ortalyqqa jiberiletin boldy. Sondyqtan turaqty mekenjaıy joq tulǵalar sanynyń ósýine osy jaıtta sebep bolǵan.
«Baratyn jeri bolmaǵandyqtan eriksiz qabyldaımyz. Dalada qaldyrmaımyz ǵoı endi. Biz Taldyqorǵan qalasynyń ákimdigine qaraımyz, biraq aýdandardan da kelip jatady. Qazir ortalyqta 45 maman jumys isteıdi», - deıdi atalǵan mekemeniń dırektory.
Osydan tórt jyl buryn ashylǵan mekemeni osylaısha 170-ke jýyq adam panalaýda. Osy ýaqyt ishinde 600-den astam adam bul jerden pana taýyp, qujatyn rettep, qoǵamǵa beıimdelgen.
