Taldyqorǵandyq Qanatbek Erjanov 25 jyl qan tapsyryp keledi

Onyń aıtýynsha, ol jylda 4 ret qan ótkizip turady jáne muny azamattyq paryzym dep sanaıdy, dep habarlaıdy QazAqparat tilshisi. 

-  Alǵash qan tapsyrǵan kúnińiz esińizde me?

-  Iıa esimde. Alǵash 1993 jyly qan tapsyrdym. Sodan beri ár jyl saıyn 4 retten donor bolamyn. Osy ýaqytqa deıin shamamen 40 lıtrge jýyq qanymdy tapsyrdym.

-  Qan tapsyrý siz úshin qanshalyqty mańyzdy?

- Ony ózimniń azamattyq paryzym dep sanaımyn. Qanǵa muqtaj bolǵan jandarǵa az da bolsa kómegim tıse - men úshin qýanysh. Bir adamnyń ómirin saqtap qalýǵa úles qosqanym úshin baqytty sezinemin.

  - Donorlyq adamnyń densaýlyǵyna qalaı áser etedi?

- Bul birinshiden, qandy qajet etken adamǵa kómek bolsa, ekinshiden, óz densaýlyǵyńa paıdaly. Qan jańarady. Aǵza tazarady. Adam ózin jeńil sezinip, jasara túsedi. Qan qysymy jáne júrek aýrýlarymen aýyrmaısyń. Qan jańarsa, kóńil-kúıiń de jaqsaryp, kúsh-qýatyń arta túsedi. Meniń qan tapsyrý ýaqytym jaqyndaǵanda denem aýyrlanyp, kóńil-kúıim bolmaı, mazam ketedi. Qan tapsyrǵannan keıin ómirime ómir qosylǵandaı áserde bolamyn, jumysyma erekshe qulshynyspen kelemin. Odan keıin psıhologııalyq sabyrlyqqa, tózimdilikke jaqsy kómek beredi.

  - Siz Qazaqstannyń qurmetti donorysyz. Ózińizdi qorshaǵan adamdar qalaı qabyldaıdy?

- Júrgen jerimde týystarymdy, áriptesterimdi, jerlesterimdi qan tapsyrýǵa úgittep, shaqyramyn. Sebebi, bul abyroıly is. Naýqas adamǵa kómektesip, apatqa ushyraǵan azamattardyń ómirin saqtap qalý, jalpy qanǵa muqtaj jandarǵa qol ushyn berý - deni saý azamattardyń otandastary aldyndaǵy paryzy dep baǵalaý kerek. Árbir qan tapsyrý kezinde bizden analız alyp otyrady. Sol saraptamanyń nátıjesi jaqsy bolǵan saıyn óziń de qanyńdy tapsyra bergiń keledi.

Aıta keteıik, 18 jasqa tolǵan densaýlyǵynda kináraty joq kez-kelgen azamat qan tapsyra alady. Qanatbek Erjanov qan tapsyrý abyroıly is ekenin este saqtap, «kómekke zárý azamattarǵa qol ushyn sozýǵa shaqyramyn», dep suhbatyn aıaqtady.