Taldyqorǵandyq izdeý jarııalanǵan jasóspirimdi tabýǵa kómektesti
ALMATY. QazAqparat– Taldyqorǵan qalasynyń turǵyny polıtsııa izdeý jarııalanǵan balany aman-esen tabýǵa kómektesti, dep habarlaıdy QazAqparat tilshisi.
Qaratal aýdanynyń polıtsııasyna Úshtóbe qalasynyń turǵyny habarlasyp, jergilikti mektepterdiń birinde 8-synyp oqıtyn ulynyń túste belgisiz baǵytta shyǵyp, úıine oralmaǵanyn aıtqan. Aýdandyq jáne oblystyq tártip saqshylary jasóspirimniń mekenjaıyn anyqtaýǵa baǵyttalǵan keń aýqymdy jedel sharalardy qabyldady.
«Búgin izdeý jarııalanǵan jasóspirimdi kópqabatty úıdiń podezdinen kórgen jergilikti turǵyn áleýmettik jelide kórsetilgen nómirge jáne polıtsııaǵa habarlady. Bala aman-esen tabylyp, ata-anasyna tapsyryldy. Jasóspirimdi izdep tabýǵa jáne onyń ata-anasy kelgenshe balaǵa qoldaý kórsetken qala turǵynyna polıtsııa tarapynan alǵysymyzdy bildiremiz»,- dep habarlady vedomstvonyń baspasóz qyzmeti.
14 jastaǵy balanyń úıinen ketip qalýyna otbasy músheleriniń arasyndaǵy túsinbeýshilik sebep bolǵan. Sabaq úlgerimi jaqsy jasóspirim buǵan deıin mundaı oǵash qylyq kórsetpegen. Tártip saqshylary balanyń ata-anasymen túsindirý jumystaryn júrgizdi.
Almaty oblystyq PD taratqan aqparatqa sáıkes, tártip saqshylary 2019 jyly belgisiz baǵytta ketip, izdeý jarııalanǵan jasóspirimderdiń 139-yn taýyp, jaqyndaryna aman esen tabystaǵan.
