Taldyqorǵandyq hokkeıshiler álem chempıonatyna daıyndyq ústinde
TALDYQORǴAN.QazAqparat - Elimizdiń kógaldaǵy hokkeıshileri álem chempıonatyna daıyndyqty bastap ketti. Aıtýly dodaǵa Qazaqstannyń atynan el tarıhynda tuńǵysh ret erler men áıelder qurama komandasy qatar qatysqaly otyr. Olar 2018 jyly Germanııada ótetin jarysta baqtaryn synaıtyn bolady, dep habarlaıdy QazAqparat tilshisi.
Sportshylar Taldyqorǵanda Májilis depýtaty, Qazaqstannyń kógaldaǵy jáne ındoorhokkeı federatsııasynyń prezıdenti Serik Úmbetovpen kezdesti. Federatsııa prezıdenti sporttyń osy túrin damytýǵa Almaty oblystyq bıýdjetinen 76 mln teńge bólingenin jáne aldaǵy ýaqytta qosymsha qarjy qaralatynyn jetkizdi.
«Qos qurama álem chempıonatynda óner kórsetýge múmkindik alyp otyr. Federatsııa basshylyǵyna kóp rahmet. Bizdiń aldymyzda álemniń eń myqty 6 komandasynyń qataryna kirý mindeti tur. Úmitti aqtaýǵa tyrysamyz», - deıdi «Besarys» áıelder ulttyq qurama komandasynyń kapıtany Natalıa Gataýllına.
Dál osy sport túrleriniń damýyna Almaty oblysynda barlyq jaǵdaı jasalǵan. Kógaldaǵy hokkeı oınaıtyn alań Qazaqstanda birinshi bolyp Taldyqorǵan qalasynda salyndy. Barlyq halyqaralyq standarttarǵa saı sport kesheni sportshylardyń bıik jetistikterge jetýine múmkindik berdi. Taldyqorǵanda qurylǵan «Besarys» klýby negizinde Qazaqstannyń qurama komandasy jasaqtalǵan. Kásipqoı klýb Qazaqstan men Azııanyń birneshe dúrkin chempıony atandy. Qazirgi tańda Almaty oblysynda 300-ge jýyq sportshy kógaldaǵy hokkeımen aınalysady.
