Taldyqorǵandyq balalar memlekettik rámizderge degen súıispenshiligin bildirdi
TALDYQORǴAN. QazAqparat - Taldyqorǵannyń jas sýretshileri Memlekettik rámizder kúnine oraı kreatıvti sýretter saldy, dep habarlaıdy QazAqparat tilshisi.
Memlekettik rámizder kúnine oraı Taldyqorǵan qalasynyń «Qaratal» ózeniniń jaǵasynda «Obektıvtegi ART álem» baıqaýy ótti. Onda jas sýretshiler Qazaqstan Respýblıkasynyń Memlekettik rámizderi kúnine oraı sýret saldy. Atalǵan is-sharany Almaty oblysy Іshki saıasat basqarmasy janyndaǵy «Jetisý media» KMM uıymdastyrdy.
Aldymen, № 45 balabaqsha búldirshinderi QR Ánuranyn oryndady. Odan ári kórkemsýret mektebi men Nazarbaev Zııatkerlik mektebiniń oqýshylary ulttyq sımvoldar men rámizderdi beıneleýge kiristi. 45 mınýt ishinde 12 jas talant óz jumystaryn aıaqtady. Ár sýret óziniń shyǵarmashylyǵymen erekshelendi.
«Tý, Eltańba jáne Ánuran halqymyzdyń: birlik, beıbitshilik, kelisim, dostyq, erkindik, bolashaqqa degen umtylystyń qundylyqtaryn bildiredi. Bul mereke biz úshin – erekshe. Rámizderdegi beıneler, bizdiń elimizde bereke-birligi jarasqan ulttar turatynyn árkez eske salady. Men osyny óz týyndymda kórsetýge tyrystym. Kóbine, Tý men Eltańbadaǵy altyn-kógildir tústi paıdalandym», - dedi qatysýshy Aıdana Raıymjan.
Uıymdastyrýshylardyń aıtýynsha, baıqaýdyń maqsaty – adamgershilik-patrıottyq sezimge, Otanǵa degen súıispenshilik pen qurmetke tárbıeleý, qazaqstandyq patrıotızmdi qalyptastyrý, kórkem shyǵarmashylyq salasyndaǵy talantty tulǵalardy anyqtaý.
«4 maýsym – Qazaqstan Respýblıkasynyń Memlekettik rámizder kúni. Memlekettik rámizder – bul memleketimizdiń ótkeni, búgini jáne bolashaǵy arasyndaǵy sabaqtastyqtyń kórinisi. Osy is-shara arqyly biz jas urpaqtyń memlekettik rámizderge degen súıispenshiligi men qurmetin oıatqymyz keledi. Árbir qazaqstandyqtyń azamattyq paryzy-osy qasıetti qundylyqtarǵa qurmetpen qaraý. Elimizdiń odan ári órkendeýin tileımin», - dedi «Jetisý media» KMM basshysynyń orynbasary Muratbek Baltabekov.
«Obektıvtegi ART álem» baıqaýynyń qorytyndysy boıynsha qatysýshylarǵa alǵys hattar men estelik syılyqtar tabys etildi.
